राष्ट्रपतिमा पौडेल निर्वाचित

काठमाडौं,तेस्रो राष्ट्रपतिका लागि भएको निर्वाचनमा नेपाली कांग्रेसका नेता रामचन्द्र पौडेल राष्ट्रपतिमा निर्वाचित भएका छन् । पौडेलले प्रतिस्पर्धी (एमाले)का नेता सुवासचन्द्र नेम्वाङलाई हराउँदै ३३ हजार ८०२ मतभार ल्याई विजयी भए । एमाले उम्मेदवार नेम्वाङले १५ हजार ५ सय १८ मतभार मात्र ल्याएका थिए।

मतदानमा तीन सय १३ सङ्घीय सांसद र पाँच सय १८ प्रदेशसभा सदस्यले मतदान गरेका थिए । पूर्व सभामुखसमेत रहेका पौडेल कांग्रेससहित नेकपा (माओवादी केन्द्र), नेकपा (एकीकृत समाजवादी), जनता समाजवादी पार्टी नेपाल, लोकतान्त्रिक समाजवादी पार्टी नेपाल, जनमत पार्टी, नागरिक उन्मुक्ति पार्टी, राष्ट्रिय जनमोर्चा र नेपाल समाजवादी पार्टीको साझा उम्मेदवार रहेका थिए। त्यस्तै पूर्व सभामुख नेम्वाङलाई एमालेको मात्र समर्थन रहेको थियो ।

राष्ट्रपतिको निर्वाचन सङ्घीय संसद् (प्रतिनिधिसभा र राष्ट्रियसभा) र प्रदेशसभाका सदस्य मतदाता रहेको निर्वाचकमण्डलबाट भएको थियो । राष्ट्रपति निर्वाचनमा सङ्घीय संसद्तर्फ तीन सय ३२ र प्रदेशसभा सदस्य पाँच सय ५० गरी कूल आठ सय ८२ मतदाता कायम रहेका थिए । सङ्घीय सांसदको मतभार ७९ र प्रदेशसभा सदस्यको मतभार ४८ रहेको थियो।