Techie IT
आजको आर्थिक दैनिक

Aarthik Dainik

An Economic Newsportal

गृहपृष्ठप्रदेश समाचारदोलखाका नौ स्थानीय तहको बेरुजु ३९ करोड ५६ लाख बढी

दोलखाका नौ स्थानीय तहको बेरुजु ३९ करोड ५६ लाख बढी


दोलखा । जिल्लाका नौवटा स्थानीय तहमा ३९ करोड ५६ लाख ४० हजार रूपैयाँ बेरुजु देखिएको छ । महालेखापरीक्षकको कार्यालयले सार्वजनिक गरेको आर्थिक वर्ष २०७८/०७९ प्रतिवेदनअनुसार उक्त रूपैयाँबराबर बेरुजु देखिएको हो ।

प्रतिवेदनअनुसार सबैभन्दा बढी बेरुजु भीमेश्वर नगरपालिकाको रहेको छ भने सबैभन्दा कम बेरुजु बैतेश्वर गाउँपालिकाको रहेको छ । महालेखाका अनुसार भीमेश्वर नगरपालिकाको सबैभन्दा धेरै आठ करोड ५९ लाख ७८ हजार रूपैयाँ बेरुजु देखिएको छ । यो रकम लेखापरीक्षण दुई अर्ब १९ करोड ५४ लाख ६६ हजार रूपैयाँबराबरको गरिएको थियो । त्यस्तै एक अर्ब २५ करोड ९९ लाख ६७ हजार रूपैयाँको लेखापरीक्षण गरेको बैतेश्वर गाउँपालिकाको बेरुजु तीन करोड ३९ लाख ३७ हजार रूपैयाँ रहेकोे छ । बैतेश्वर गाउँपालिकाको यो बेरुजु जिल्लाका अन्य स्थानीय तहको भन्दा कम हो ।

त्यसैगरी जिरी नगरपालिकाको एक अर्ब १५ करोड २१ लाख ९८ हजार रूपैयाँको लेखापरीक्षण गर्दा पाँच करोड ६१ लाख ४० हजार रूपैयाँ बेरुजु भेटिएको छ । बिगु गाउँपालिकाको एक अर्ब ११ करोड ६५ लाख ७१ हजार रूपैयाँको लेखापरीक्षण गर्दा पाँच करोड ४२ लाख एक हजार रूपैयाँ बेरुजु देखिएको छ । त्यस्तै कालिञ्चोक गाउँपालिकाको छ करोड ३८ लाख ८१ हजार रूपैयाँ, तामाकोशी गाउँपालिकाको छ करोड १५ लाख ७१ हजार रूपैयाँ, मेलुङ गाउँपालिकाको चार करोड २५ लाख ६६ हजार रूपैयाँ बेरुजु रहेको छ । त्यस्तै गौरीशंकर गाउँपालिकाको चार करोड ७५ लाख ३६ हजार रूपैयाँ र शैलुङ गाउँपालिकाको तीन करोड ५८ लाख आठ हजार रूपैयाँ बेरुजु रहेको महालेखाको प्रतिवेदनमा उल्लेख छ ।


क्याटेगोरी : प्रदेश समाचार, बागमती प्रदेश
ट्याग : #Page 8

तपाईको प्रतिक्रिया