प्राधिकरणले विद्युत कटौती गरेपछि उद्योगीहरु सडकमा

विराटनगर । जानकारी बिना नै नेपाल विद्युत प्राधिकरणले विद्युत कटौती गरेपछि सुनसरी मोरङ औद्योगिक क्षेत्रका उद्योगीहरु सडकमा उत्रिएका छन् ।

नियमित विद्युत आपूर्ति माग गर्दै नेपाल उद्योग परिसंघ, उद्योग संगठन मोरङ, नेपाल उद्योग वाणिज्य महासंघ, मोरङ व्यापार संघलगायत संस्था आन्दोलनमा छन् । नियमित विद्युत आपूर्ति गर्न नसके लोडसेडिङको कार्यतालिका दिनुपर्ने उनीहरुको माग छ ।

औद्योगिक क्षेत्रमा विहान ६ बजेदेखि १० बजेसम्म र बेलुका ५ बजेदेखि राति १० बजेसम्म विद्युत प्रधिकरणले दैनिक विद्युत कटौती गरिरहेको छ । त्यस बाहेक अन्य समयमा पनि विद्युत कटौती हुने गरेको उद्योगीको गुनासो छ ।

अनियमित रुपमा विद्युत कटौती हुँदा उद्योगको कच्चा पदार्थमा क्षति पुग्ने गरेको मोरङ व्यापार संघका अध्यक्ष नवीन रिजालले बताए । आइतबार मोरङ व्यापार संघको अगुवाईमा विद्युत प्रधिकरण दुहबी ग्रिडमा धर्ना दिएका व्यवसायीहरले नियमित विजुली दिन नसके लोडसेटिङ तालिका सार्वजनिक गर्न माग गरे ।

सुनसरी मोरङ औद्योगिक करिडोमा मंसिरबाटै विद्युत कटौती सुरु भएको उद्योगीको गुनासो छ । उद्योगी व्यावसायीले दुहबी ग्रिडका प्रमुख रोशन खड्कालाई ज्ञापनपत्र समेत बुझाएका छन् ।