अनुकूल मौसम पर्खिदै तीन सय आरोही सगरमाथा आधार शिविरमा

सोलुखुम्बु । सगरमाथा आरोहणका लागि झण्डै तीन सय आरोहीहरु सगरमाथाको आधार शिविर पुगेका छन् । सगरमाथा आरोहणमा गएका आरोही र उनीहरुका सहयोगी सगरमाथा आधार शिविर र दोस्रो शिविरसम्म पुगेका हुन् ।

आधार शिविरमा आरोहीको बास व्यवस्थापनका लागि टाँगिएका रङ्गीचङ्गी त्रिपालले छुट्टै रौनक छाएको छ । पर्यटन विभागको पर्वतारोहण शाखाका अनुसार यतिखेर ३० भन्दा बढी आरोही समूहका झण्डै तीन सय आरोही सगरमाथा आधार शिविर र दोस्रो आधार शिविरमा पुगेका छन् ।

उनीहरु सगरमाथाको चुचुरोमा पुग्न उपयुक्त मौसमको प्रतीक्षामा छन् । अहिले विभागबाट आरोहण अनुमति लिनेको संख्या पनि बढ्दै गएको छ । केही आरोही बीचबाटोमै छन् । विभागका अधिकृत विज्ञान कोइरालाले सर्वोच्च शिखर सगमाथा आरोहणका लागि हालसम्म ४१ आरोही समूहका चार सय ५४ आरोहीले अनुमति लिएको जानकारी दिए ।