जुम्ला र कालिकोटका दुई सय १० जना मोतिविन्दुका बिरामीको निःशुल्क शल्यक्रिया

काठमाडौं । जुम्ला र कालिकोटका दुई सय १० जना मोतिविन्दुका बिरामीको निःशुल्क शल्यक्रिया गरिएको छ । नेपाल नेत्रज्योति संघ हिमालय आँखा अस्पताल पोखराको प्राविधिक सहयोगमा जुम्ला र कालिकोट जिल्ला आयोजना गरिएको विभिन्न आँखा शिविरमार्फत उनीहरूको निःशुल्क शल्यक्रिया गरिएको हो ।

विभिन्न पालिकाका नौ सय ८६ जना बिरामीको आँखा परीक्षण गर्दा दुई सय १० जनामा मोतियाविन्दुको समस्या देखिएको थियो । मोतियाविन्दु देखिएका सबै बिरामीहरूको नेपाल नेत्रज्योति संघ एकीकृत आँखा तथा कान स्वास्थ्य कार्यक्रम कर्णाली, आई केयर फाउन्डेसन र रिड्ली फाउन्डेसनको आर्थिक सहयोगमा निःशुल्क शल्यक्रिया गरिएको हो । असोज ११ गतेदेखि १४ गतेसम्म नेपाल नेत्रज्योति संघ जिल्ला शाखा जुम्लाको आयोजनामा जुम्लाको खलङ्गामा सञ्चालन गरिएको शिविरमा ९० जनाको मोतिविन्दुको निःशुल्क शल्यक्रिया गरिएको थियो भने चार सय ११ जनाको निःशुल्क आँखा परीक्षण गरिएको थियो । त्यस्तै असोज १५ गतेदेखि १७ गतेसम्म जुम्लाको हिमा गाउँपालिकामा सञ्चालन गरिएको शिविरमा ४३ जनाको मोतिविन्दुको निःशुल्क शल्यक्रिया गरिएको थियो भने तीन सय ५० जनाको निःशुल्क आँखा परीक्षण गरिएको थियो ।

त्यसैगरी असोज २० र २१ गते कालिकोटको पलाँता गाउँपालिकामा सञ्चालन गरिएको शिविरमा ७७ जनाको मोतिविन्दुको निःशुल्क शल्यक्रिया गरिएको थियो भने दुई सय २५ जनाको निःशुल्क आँखा परीक्षण गरिएको थियो । नेपाल नेत्रज्योति संघले पैसाको अभावका कारण कोही पनि अन्धोपनमा जीवन बिताउन नपरोस् भन्ने हेतुले पछिल्लो समय हुनेसँग लिने र नहुँनेलाई सेवा दिने उद्देश्यले स्थानीय सरकारसँगको साझेदारीमा उज्यालो अभियान कार्यक्रम सञ्चालन गर्दै आएको छ ।