काठमाडौं, स्वरोजगार लघुवित्त वित्तीय संस्था लिमिटेडले विन नेपाल लघुवित्त वित्तीय संस्था लिमिटेडलाई प्राप्ति गरी स्वरोजगार लघुवित्त वित्तीय संस्था लिमिटेडको नामबाट आइतबार देखि एकीकृत वित्तीय कारोबार सुरु गरेको छ । काठमाडौँमा आयोजित एक समारोहका बीच स्वरोजगार लघुवित्त वित्तीय संस्थाका अध्यक्ष ज्ञानेन्द्र प्रसाद पाण्डे तथा विन नेपाल लघुवित्त वित्तीय संस्थाका कार्यवाहक अध्यक्ष कुमार राज जोशीज्यूले संयुक्त रूपमा उक्त एकीकृत कारोबारको शुभारम्भ गरेका हुन् ।
एकीकृत कारोबारसँगै संस्थाको शाखा सञ्जाल, सदस्य संख्या, कजर्(ा तथा बचत कारोबारलाई एउटै संस्थामार्फत सञ्चालन गरिने संस्थाले जानकारी दिएको छ । यसबाट संस्थाको वित्तीय क्षमता तथा सञ्चालन दक्षता थप मजबुत हुने अपेक्षा गरिएको छ । एकीकृत कारोबार अघि स्वरोजगार लघुवित्तको चुक्ता पुँजी करिब ८९ करोड ५६ लाख र विन नेपाल लघुवित्तको चुक्ता पुँजी करिब आठ करोड ४३ लाख रुपैंयाँ रहेको थियो । दुवै संस्थाको एकीकरणपछि चुक्ता पुँजी करिब ९७ करोड ९९ लाख पुगेको छ ।
एकीकृत कारोबारपछि संस्थाको कुल शाखा संख्या एक सय १२, सक्रिय सदस्य संख्या एक लाख ३२ हजारभन्दा बढी तथा कर्मचारी संख्या करिब छ सय १९ पुगेको संस्थाले जनाएको छ । साथै, एकीकृत संस्थाको कुल कर्जा लगानी करिब ११ अर्ब ७१ करोड र कुल बचत करिब पाँच अर्ब ८८ करोड पुगेको छ ।
लघुवित्त क्षेत्रमा बढ्दो प्रतिस्पर्धाबीच दुई संस्थाको एकीकरणले संस्थाको पुँजीगत आधार, पहुँच र सञ्चालन क्षमता विस्तार गर्नुका साथै ग्रामीण तथा विपन्न वर्गमा वित्तीय सेवा थप प्रभावकारी रूपमा पुर्याउन सहयोग पुग्ने अपेक्षा गरिएको छ । एकीकृत कारोबार शुभारम्भसँगै स्वरोजगार लघुवित्तले थप सबल वित्तीय संस्थाका रूपमा अघि बढ्दै आफ्ना सदस्य तथा सेवाग्राहीलाई गुणस्तरीय, सहज र पहुँचयोग्य वित्तीय सेवा प्रदान गर्ने लक्ष्य लिएको छ ।
