काठमाडौं, नेसनल लाइफ इन्स्योरेन्स कम्पनी लिमिटेडले चारदिने सम्मेलन ब्रान्च मेनेजर्स कन्फरेन्स गोरखामा सम्पन्न गरेको छ । ‘रेजिङ द बार, रिडिफाइनिङ सक्सेस’ नाराका साथ आयोजना गरिएको सम्मेलनमा कम्पनीको व्यवसाय विस्तार, आगामी व्यावसायिक रणनीति, प्रतिस्पर्धात्मक बीमा बजारका चुनौती तथा कर्मचारीको क्षमता अभिवृद्धिलगायतका विषयमा व्यापक छलफल तथा प्रशिक्षण गरिएको थियो ।
कम्पनीका अध्यक्ष श्रीमती प्रेमा राज्यलक्ष्मी सिंहको सभापतित्वमा समुद्घाटन गरिएको उक्त समारोहलाई सम्बोधन गर्दै अध्यक्षले जीवन बीमा व्यवसाय दिन प्रतिदिन प्रतिस्पर्धात्मक हुँदै गइरहेको हुँदा यसमा हामी सबैले सोही अनुसार आफूलाई तयार गरी व्यवसाय प्रवर्द्धन गर्नुपर्ने चुनौति रहेको बताइन् । यसका लागि आवश्यक तालिम प्रशिक्षण प्रदान गर्न कम्पनीसधँै अग्रसर रहेको र यसै सम्बन्धमा अहिले विश्व भर चर्चित रहेको र खास गरी जीवन बीमामा ठूलो योगदान पुर्याउने सम्भावना रहेको आर्टिफिसियल इन्टिलिजेन्स सम्बन्धमा कर्मचारीहरुलाई प्रशिक्षण प्रदान गरी कम्पनीको डिजिटल मार्केटिङलाई प्रवर्द्धन गर्नेतर्फ प्रयासरत रहनुपर्ने विचार व्यक्त गरिन् ।
कम्पनीले निरन्तर रुपमा आफ्नो कर्मचारीका लागि मानव संसाधनमा यथासम्भव लगानी गरेर उनीहरुको वृत्ति विकासमा योगदान पुर्याइ रहेको र आउने दिनहरुमा पनि यो कायम रहने जानकारी गराइन् । आगामी दिनमा पनि कर्मचारीहरुको अधिकतम प्रयास र आपसी समन्वयबाट कम्पनीको व्यवसायिक उचाई थप वृद्धि हुने विश्वास उनले व्यक्त गरिन् ।
कार्यक्रममा कम्पनीका प्रमुख कार्यकारी अधिकृत सुरेश प्रसाद खत्रीले स्वागत मन्तव्य व्यक्त गर्ने क्रममा, नयाँ आर्थिक वर्षको सुरुवातसंगै एउटा नयाँ यात्रा, नयाँ संकल्प र नयाँ अवसरको सुभारम्भमा एक जुट भएर उभिएका र यो केवल क्यालेन्ड परिवर्तन भएको दिन मात्र नभई सोच, प्रतिवद्धता र भविष्यलाई अझ उचाइमा पुर्याउन प्रण गर्ने शुभ अवसर रहेको बताए । सम्मेलनमा कम्पनीका विभागीय प्रमुखहरुसहित देशभरका प्रदेश प्रमुख, शाखा प्रमुख तथा मार्केटिङ कर्मचारी गरी दुई सय जनाभन्दा बढीको सहभागिता रहेको थियो र नियमनकारी निकाय नेपाल बीमा प्राधिकरणका निर्देशक शम्भराज लामिछानेले सम्पत्ति शुद्धीकरण तथा आतंकवादी क्रियाकलापमा वित्तीय लगानी निवारणसम्बन्धी प्रशिक्षण प्रदान गरे । जीवन बीमाको माध्यमबाट समेत सम्पत्ति शुद्धीकरण हुने सम्भावना बढ्दै गएको भन्दै उहाँले कम्पनीमा कार्यरत सबै तहका कर्मचारीहरू यस विषयमा विशेष चनाखो र जिम्मेवार भएर काम गर्नुपर्नेमा जोड दिए ।
यसै गरी कर्मचारीहरुलाई प्रविधिमा समेत अब्बल बनाउने उदेश्यले आर्टिफिसियल इन्टेलिजेन्ससम्बन्धी प्रशिक्षक श्री विश्वराज पौडेलले विशेष प्रशिक्षण प्रदान गरेका थिए । उनले एआईका विभिन्न टुल्सहरुको बारेमा जानकारी दिदैं एआईलाई प्रयोग गरी बीमा व्यवसायलाई डिजिटल माध्यामबाट प्रभावकारी मार्केटिङ कसरी गर्न सकिन्छ भन्ने विषयमा प्रशिक्षण प्रदान गरेका थिए ।
त्यस्तै, प्रतिस्पर्धात्मक बीमा बजारमा व्यवसाय विस्तारका चुनौती सामना गर्दै व्यावसायिक सफलता हासिल गर्ने विषयमा श्रीलंकाबाट आएका अन्तर्राष्ट्रिय प्रशिक्षक सुरन डी सिल्भाले विभिन्न व्यावहारिक उदाहरण प्रस्तुत गर्दै बजार विस्तार, व्यवसाय वृद्धि तथा प्रतिस्पर्धामा सफल हुने उपायबारे सहभागीहरूलाई प्रशिक्षण प्रदान गरेका थिए । सम्मेलनका अवसरमा आर्थिक वर्ष २०८२÷८३ मा शाखा संचालनका विभिन्न आयाममा उत्कृष्ट कार्य गर्ने पाँच शाखा कार्यालय, यसैगरी अधिकतम प्रथम बीमाशुल्क संकलनमा, अधिकतम सक्रिय अभिकर्ता उत्पादन र अधिकतम बीमालेख संख्याको आधारमा उत्कृष्ट तीन शाखा कार्यालयलगायत चेयरपर्सन क्लब योजना र सीईओ क्लब योजनामा सबै भन्दा धेरै अभिकर्तालाई छनौट गराउन सफल उत्कृष्ट एक÷एक शाखा कार्यालयहरुलाई कम्पनीका अध्यक्ष ज्यूले सम्मान तथा पुरस्कार प्रदान गरेका थिए ।
सम्मेलनमा कर्मचारीहरूको क्षमता विकाससँगै मनोरञ्जन र आपसी सम्बन्ध सुदृढ गर्ने उद्देश्यले विभिन्न सांगीतिक तथा मनोरञ्जनात्मक कार्यक्रमसमेत आयोजना गरिएको थियो । पुरुष तथा महिला कर्मचारीहरूको सहभागीतामा ब्याडमिन्टन तथा टेबल टेनिस प्रतियोगिता तथा म्युजिकल चेयर जस्ता खेल सञ्चालन गरिएको थियो । खेल प्रतियोगिताका विभिन्न विधामा उत्कृष्ट हुने कर्मचारीहरूलाई प्रमुख कार्यकारी अधिकृत खत्रीले पुरस्कार प्रदान गरेका थिए । चार दिने सम्मेलनले कम्पनीको आगामी व्यावसायिक रणनीति तय गर्नुका साथै शाखा तथा केन्द्रीय कार्यालयका कर्मचारीबीच आपसी समन्वय, क्षमता अभिवृद्धि र संस्थागत प्रतिबद्धतालाई थप मजबुत बनाएको कम्पनीले जनाएको छ ।
