काठमाडौं, नेपाल एसोसिएसन अफ टुर एन्ड ट्राभल एजेन्ट्स (नाट्टा)को ५९औँ वार्षिक साधारणसभासँगै हुने २५औँ कार्यसमिति निर्वाचनका लागि भरतजंग पाण्डेको समूहले प्यानलसहित उम्मेदवारी घोषणा गरेको छ ।
आगामी अगस्ट १४ मा हुने निर्वाचनका लागि ‘सशक्त नाट्टा समृद्ध पर्यटनः सदस्यसँगै, सदस्यका लागि’ भन्ने नाराका साथ यो समूह चुनावी मैदानमा उत्रिएको हो । यस समूहको नेतृत्व गर्ने पाण्डे एभरेष्ट मिरेकल ट्राभल्स एण्ड टुर्सका सञ्चालक हुन्, उनी अध्यक्ष पदका उम्मेदवार बनेका छन् । पाण्डेको टिमबाट वरिष्ठ उपाध्यक्षमा सोसाइटी ट्राभल सर्भिसका सुनिल शर्मा, उपाध्यक्षमा एरो ट्राभल एण्ड टुर्सकी सबिता केसी भट्टराई, महासचिवमा वल्र्ड फेभर ट्राभल एण्ड टुर्सका राजकुमार देवकोटा, सचिवमा रुपसे होलिडेजका रमेश पराजुली, कोषाध्यक्षमा थामसेर्कु ट्राभलकी डिकी शेर्पा र सह–कोषाध्यक्षमा ह्याम्लेट टुर्स एण्ड ट्राभल्सका जीवन कोइरालाले उम्मेदवारी घोषणा गरेका छन् ।
त्यसैगरी, कार्यसमिति सदस्यहरूका रूपमा रोयल ट्राभल्स एण्ड टुर्सका दिनानाथ पाण्डे (प्रकाश), शुभम् ट्राभल्स एण्ड टुर्सका दिनेश मैनाली, सोदिप ट्राभल एण्ड टुर्सका दीपक मरासिनी र ८ आइज ट्राभल एण्ड टुर्सका नबिन गुरुङले आफ्नो दाबेदारी प्रस्तुत गरेका छन् । कार्यसमिति सदस्यकै अन्य उम्मेदवारहरूमा प्रभास ट्राभल एण्ड टुर्सका प्रकाश लोहनी, आर्य भिलेज ट्राभलकी सरला सापकोटा, हाम्रो होलिडेजका सुमन लाल श्रेष्ठ र सिटी कनेक्ट ट्राभल्स एण्ड टुर्सकी स्वस्तिका प्रधान रहेका छन् ।
अनुभवी र युवा पर्यटन व्यवसायीहरूको समिश्रण रहेको यो प्यानलले पर्यटन क्षेत्रको नीतिगत सुधार, व्यावसायिक हकहितको संरक्षण र नाट्टालाई समयसापेक्ष आधुनिक बनाउने संकल्प गरेको छ । निर्वाचनको मिति नजिकिँदै गर्दा विभिन्न ट्राभल एजेन्सीका सञ्चालकहरू सम्मिलित यो समूहले देशभरका सदस्य व्यवसायीहरूसँगको भेटघाट र चुनावी प्रचारप्रसारलाई तीव्रता दिएको जनाएको छ ।
