कोकाकोला र माइती नेपालको सहकार्य

काठमाडौं । द कोका–कोला फाउन्डेसनले एकीकृत खेती, कृषि तालिम र कृषि पर्यटनमार्फत दिगो विकास, सामुदायिक समृद्धि तथा महिला सशक्तीकरणका लागि माइती नेपालसँग सहकार्य गरेको छ ।

बागमती प्रदेशका मुख्यमन्त्री शालिकराम जमकट्टेलले मकवानपुर गढीमा आयोजित एक कार्यक्रमका बीच ‘महिला सशक्तीकरण र दिगो कृषि प्रवर्द्धन’ नामक परियोजनाको शुभारम्भ गरेका छन् । कार्यक्रममा मुख्यमन्त्री जमकट्टेलले यस परियोजनाको सुरुवातले ग्रामीण विकासलाई प्रवर्द्धन गर्न, दिगो कृषि विधिलाई बढावा दिने र समुदायलाई आर्थिक स्थायित्वमा योगदान पु¥याउने कुरामा जोड दिए । कम्पनीका अनुसार यस परियोजनाअन्तर्गत बाँचेका, ग्रामीण महिला र बेचबिखनको जोखिममा परेका बालिकाहरूलाई तालिम दिने गरी तालिम केन्द्र स्थापना गरिनेछ । परियोजनाको लक्ष्य, ३० जना व्यक्तिहरुका लागि दिगो आर्थिक स्रोत सुनिश्चित गर्ने र उनीहरूलाई कृषि क्षेत्रमा सफलताको लागि आवश्यक सीपहरू प्रदान गर्ने रहेको छ ।

तालिमपछि यस संस्थाले सहभागीहरुलाई ‘स्टार्ट–अप’ गर्न आवश्यक कोषका लागि स्थानीय सरकार र बैंकिङ संस्थाहरूसँग लिंक गर्नेछ । दोस्रो वर्षमा भने फाउन्डेसनले रोजगारीका अवसरहरू प्रदान गर्नुका साथै सहभागीहरूलाई उनीहरुले नयाँ सिकेको ज्ञान कार्यान्वयन गर्न कृषि–पर्यटनका नमूना इकाइहरू स्थापना गर्ने योजना पनि बनाएको छ । साथै आफ्नो गाउँमै करियर बनाउन चाहनेलाई संस्थाले स्थानीय निकायसँग समन्वय गरी बैंकबाट कृषि ऋणलगायत आर्थिक सहयोग पनि उपलब्ध गराउनेछ ।