प्रभु क्यापिटलका हितग्राही खातालाई टोटल फिजिकल फिटनेसमा छुट

काठमाडौं । प्रभु क्यापिटलमा डिम्याट खाता खोलेका सम्पूर्ण हितग्राही ग्राहकहरूले शारीरिक व्यायामको लागि टोटल फिजिकल फिटनेस सेन्टरमा छुट पाउने भएका छन् । उक्त फिटनेससँग क्यापिटलले यही साउन ३१ गते सोसम्बन्धी सम्झौता गरेपछि हितग्राहीले यस्तो छुट पाउने भएका हुन् ।

सम्झौतापत्रमा क्यापिटलको तर्फबाट प्रमुख कार्यकारी अधिकृत आशीष गौचन र फिटनेसका तर्फबाट प्रबन्ध निर्देशक सुमन पण्डितले हस्ताक्षर गरेका हुन् । क्यापिटलका ग्राहकहरूले फिटनेस सेन्टरमा सेवा लिँदा २८ प्रतिशतसम्म छुट पाउनका साथै निःशुल्क साउना कुपन पाउने बताइएको छ । यो योजनाबाट लाभ लिन हितग्राहीले बिल पेमेन्ट गर्दा प्रभु क्यापिटल लिमिटेडमा हितग्राही खाता रहेका जानकारीसहित हितग्राही खाता नम्बर उक्त फिटनेस सेन्टरलाई उपलब्ध गराउनुपर्नेछ यो अफरको लाभ क्यापिटलका हितग्राही ग्राहकले छुट सम्झौता भएको मितिबाट पाँच वर्षसम्म लिन सक्नेछन् ।

काठमाडौंको नयाँ बानेश्वर क्षेत्रमा रहेको टोटल फिजिकल फिटनेस सेन्टर अत्याधुनिक उपकरणबाट सेवा प्रदान गरिरहेको छ । यस फिटनेस सेन्टरमा फ्लेक्स र टोन, तौल घटाउने, को–एड बक्सिङ, बर्नस र एब्स, स्पिनिङ, किक बक्सिङ, स्टेप एन्ड टोन, कार्डियो, जुम्बा, योग र जिमजस्ता विभिन्न उपकरणहरू रहेका छन् र उक्त फिटनेस सेन्टरमा भर्ना भएपश्चात् सुरुमा सात दिनको प्रशिक्षण कार्यक्रम सञ्चालन हुने र अन्य दिनमा समेत प्रशिक्षकको निगरानीमा सम्पूर्ण व्यायामहरू गर्न पाइने छ । खानपानमा समेत ध्यान दिँदै फिटनेस सेन्टरमा डायटिसिएनको पनि व्यवस्था रहेको क्यापिटलले जनाएको छ । हाल प्रभु क्यापिटलले दुई लाख ३० हजारमाथि हितग्राही ग्राहकलाई डीपी सेवा प्रदान गरिरहेको छ ।