ज्योति विकास बैंकद्वारा अस्पताललाई बेबी वार्मर प्रदान

काठमाडौं । ज्योति विकास बैंकले संस्थागत सामाजिक उत्तरदायित्व प्रयोजनार्थ स्थापना गरेको हाम्रो विकास प्रवर्द्धन कोषमार्फत मधेश प्रदेश, बागमती प्रदेश, लुम्बिनी प्रदेश र सुदूरपश्चिम प्रदेशका छवटा स्वास्थ्य केन्द्रहरूलाई राष्ट्रिय आविष्कार केन्द्रद्वारा स्वदेशमै निर्मित बेबी वार्मर प्रदान गरेको छ । बैंकले फेटा स्वास्थ्य चौकी–बारा, खैरहनी नगर अस्पताल– चितवन, बघौडा अस्पताल–चितवन, हर्नैया स्वास्थ्य चौकी–रुपन्देही, सिसहनिया स्वास्थ्य चौकी–दाङ र दोधारा प्राथमिक स्वास्थ्य केन्द्र–कञ्चनपुरलाई नवजात शिशुको शारिरिक तापक्रम उचित राख्न प्रयोग हुने बेबी वार्मर प्रदान गरेको हो ।

अस्पतालहरूमा आयोजित कार्यक्रममा ज्योति विकास बैंकका विभिन्न पदाधिकारीहरूबाट उक्त अस्पतालहरूका पदाधिकारीहरूलगायत सम्बन्धित क्षेत्रका विभिन्न पदाधिकारीहरूको उपस्थितिका बीच सो बेबी वार्मर औपचारिकरूपमा हस्तान्तरण गरिएको हो । साथै सोही कार्यक्रमका बीच अस्पतालका डाक्टर, नर्सलगायत विभिन्न सम्बन्धित कर्मचारीहरूलाई बेबी वार्मर सञ्चालनसम्बन्धी विशेष तालिम पनि प्रदान गराइएको थियो ।

बैंकले हाम्रो विकास प्रवर्द्धन कोषमार्फत न्यानो नानी परियोजना–३ अन्तर्गत हालसालै प्रदेश नं. १ का ३ अस्पतालहरू बाक्सिला स्वास्थ्य चौकी–खोटाङ, ओखलढुंगा सामुदायिक अस्पताल र जिल्ला अस्पताल–इलामलाई एक–एक थान बेबी वार्मर प्रदान गरी तीनवटा बेबी वार्मर प्रदान गरिसकेको छ । ज्योति विकास बैंकले डा. महाविर पुनद्वारा प्रर्वधित राष्ट्रिय आविष्कार केन्द्रसँगको सहकार्यमा हालसम्म देशका ३२ विभिन्न अस्पतालहरूलाई बेबी वार्मर प्रदान गरिसकेको छ । बैंकले हाल एक सय २० वटा शाखा कार्यालय, तीनवटा विस्तारित काउन्टर तथा ७३ वटा एटीएममार्फत सेवा उपलब्ध गराउँदै आइरहेको जानकारी दिएको छ । (आर्थिक दैनिकबाट)