राष्ट्रिय सभा बैठक एमालेले गर्यो अवरुद्ध

काठमाडौँ । राष्ट्रिय सभा बैठक नेकपा एमालेले अवरुद्ध गरेको छ । सोमबारको बैठकमा सुन तस्करी प्रकरणमा उच्चस्तरीय छानविन समिति गठनमा सरकारले वेवास्ता गरेको भन्दै एमाले सांसद दिलकुमारी रावलले समिति नबनेसम्म सदन अघि बढ्न नसक्ने बताइन् ।

एमाले सांसदहरुले बैठकको सुरुमै आसनबाट उठेर विरोध जनाएपछि अध्यक्ष गणेश तिमिल्सिनाले रावललाई बोल्न समय उपलब्ध गराएका थिए । रावलले सरकारमा आवद्ध राजनीतिक दलकै नेता कार्यकर्ता सुन तस्करीमा मुछिएको भन्दै सरकार निष्पक्ष छानविनको पक्षमा नदेखिएको हुनाले बैठक चल्न नसक्ने बताइन् ।

शीर्ष नेताहरुबीच संवाद चलिरहेको र समस्या समाधानको प्रयास भइरहेकाले सांसदहरुलाई अध्यक्ष तिमिल्सिनाले आसन ग्रहण गर्न आग्रह गरेपनि उनीहरुले आसन ग्रहण गर्न नमानेपछि अध्यक्ष तिमिल्सिनाले अर्को बैठक साउन २४ गते बुधबार दिउँसो १ बजे बस्नेगरी स्थगित गरेको घोषणा गरे ।