सानिमा रिलायन्सका एजेन्सी म्यानेजरहरू सिंगापुरमा

काठमाडौं । सानिमा रिलायन्स लाइफ इन्स्योरेन्सबाट आव २०७९।८० मा उत्कृष्ट जीवनबीमा व्यवसाय गरेर एमडीआरटी हासिल गर्न सफल छ जना एजेन्सी म्यानेजरहरू सिंगापुरमा सञ्चालन हुने विश्वव्यापी सम्मेलनमा भाग लिन नेपालबाट प्रस्थान गरेका छन् । सम्मेलनमा भाग लिन जानेमा अभिकर्ताहरू नमिता न्यौपाने, श्याम गुरुङ, भावना तिम्सिना, हिमालदेवी गुरुङ, सिता भट्टराई र कल्पना बिष्ट रहेका छन् । कम्पनीले एक कार्यक्रमको आयोजना गरेर सम्पूर्ण एमडीआरटी हासिल गर्न सफल अभिकर्ताहरूलाई भव्यताका साथ बिदाई समेत गरेको छ ।

एमडीआरटी भनेको अभिकर्ताहरूको विश्वव्यापी सञ्जाल हो, जसमा भाग लिनका लागि जनवरीदेखि डिसेम्बरसम्म तोकिएको बीमा शुल्क संकलन गर्नुपर्ने हुन्छ । यस संस्थामा हालसम्म ७२ देशका पाँच सय कम्पनी आबद्ध छन् । बीमा अवधि र बीमाको किसिमलगायत विभिन्न मापदण्डमार्फत उक्त रकम हासिल गर्न सफल भएपछि मात्र कार्यक्रममा भाग लिन पाउने व्यवस्था रहेको हुन्छ । सन् २०२२ का लागि नेपालबाट एमडीआरटीमा भाग लिनका लागि ३७ लाख ९२ हजार तीन सय रुपैयाँ प्रथम बीमा शुल्क संकलन गर्नुपर्ने लक्ष्य रहेको थियो । सीओटीका लागि भने एक करोड १३ लाख ७६ हजार रुपैयाँ र टीओटीका लागि दुई करोड २७ लाख ५३ हजार रुपैयाँ प्रथम बीमा शुल्क संकलन गर्नुपर्ने प्रावधान रहेको थियो । यस संस्थाको लक्ष्य हासिल गर्नुलाई हरेक अभिकर्ताको प्रतिष्ठाको विषयको रूपमा लिइन्छ । अभिकर्ताहरूको क्षमता अभिवृद्धिका लागि यस संस्थाको सम्मेलन महत्वपूर्ण मानिन्छ । नेतृत्व विकास र क्षमता अभिवृद्धिका लागि एमडीआरटीलाई उत्कृष्ट अन्तर्राष्ट्रिय प्लेटफार्मको रूपमा रहेको हुँदा सम्पूर्ण सफल अभिकर्ताप्रति कम्पनी आभार व्यक्त गरेको छ ।