सय दिनको रोजगारीको लागि १५ हजार बढीको आवेदन

प्रधानमन्त्री रोजगार कार्यक्रमको लागि दोलखाका नौ स्थानीय तहका १५ हजार बढीले आवेदन दिएका छन् । आगामी आर्थिक वर्ष २०८१/८२ को रोजगार कार्यक्रममा सूचीकृत बनेर एक सय दिन बराबरको रोजगार प्राप्त गर्न १५ हजार चार सय ६३ जनाले आवेदन दिएको पाइएको छ ।न्यूनतम रोजगारीका लागि आवेदन फारम भर्ने सबैभन्दा धेरै कालिन्चोक गाउँपालिकामा पाँच हजार ८३ जना रहेका छन् भने सबैभन्दा कम जिरी नगरपालिका दुई सय ६५ जना रहेका छन् । कालिञ्चोकमा दुई हजार सात जना पुरुष र दुई हजार ७६ जना महिलाले आवेदन दिएका हुन् । त्यसैगरी भीमेश्वर नगरपालिकामा नौ सय १२ महिला तथा आठ सय ४ पुरुष गरी एक हजार सात सय १६ जनाले न्यूनतम रोजगारको लागि आवेदन दिएका छन् ।

त्यस्तै, जिल्लाको गौरीशंकर गाउँपालिकामा दुई हजार छ सय ६४ जनाले आवेदन दिएको पालिका रोजगार सेवा केन्द्र प्रमुख जगदीश खड्काले जानकारी दिए । गौरीशंकर गाउँपालिकामा गत वर्षको तुलनामा यस वर्ष रोजगारीको लागि आवेदन दिनेको संख्यामा वृद्धि आएको उनले बताए । गौरीशंकरले प्रधानमन्त्री रोजगार कार्यक्रमअन्तर्गत हालसम्म १५ किलोमिटर सडक सोलिङ गरेको छ ।

त्यसैगरी वैतेश्वर गाउँपालिका पनि गत वर्षको तुलनामा यस वर्ष आवेदन दिनेको संख्यामा सामान्य वृद्धि भएको छ । वैतेश्वरमा गत वर्ष पाँच सय ६१ जान आवेदन दिएका थिए भने यस वर्ष सात सय ७९ जनाले आवेदन दिएको वैतेश्वरका रोजगार सेवा केन्द्र प्रमुख वासुदेव दहालले बताए । यस्तै, जिल्लाको तामाकोशी गाउँपालिकामा एक हजार ५४ जना पुरुष र नौ सय ३८ जना महिलाले रोजगारको लागि आवेदन दिएका छन् । बिगु गाउँपालिकामा दुई हजार तीन सय एक जना, मेलुङ गाउँपालिकामा छ सय ८७ जनाले आवेदन दिएका छन् ।

यता शैलुङ गाउँपालिकाले भने हालसम्म आवेदन दिनेको संख्या नछुट्याएको र जम्मा आवेदन दिनेको यकिन संख्या आउन केही दिन लाग्ने जनाएको छ ।समग्रमा जिल्लाभर रोजगारीका लागि निवेदन दिने युवाभन्दा ५० वर्षमाथिका महिला पुरुष धेरै रहेको पाइएको छ । जिल्लाका स्थानीयतहले न्यूनतम रोजगारीका लागि सूचीकृत बनेर आउनेहरूलाई एक सय दिन अर्थात् तीन महिना १० दिन बराबर स्थानीय विकास निर्माणका कार्यमा काम लगाएर रोजगार रकम उपलब्ध गराउँदै आएको छ ।