वैदेशिक रोजगार विभाग र सीआईबीबीच सहकार्य

काठमाडौं, पुस २८
वैदेशिक रोजगारीको नाममा हुनसक्ने मानव बेचबिखन तथा ओसारपसार गर्ने कार्यलाई नियन्त्रण गर्ने उद्देश्यले वैदेशिक रोजगार विभाग र केन्द्रीय अनुसन्धान ब्युरो (सीआईबी)बीच समझदारीपत्रमा हस्ताक्षर भएको छ । गृहसचिव प्रेम कुमार राई तथा प्रहरी महानिरीक्षक सर्वेन्द्र खनालको उपस्थितिमा केन्द्रीय अनुसन्धान ब्युरो महाराजगञ्जका निर्देशक प्रहरी नायब महानिरीक्षक निरज बहादुर शाही र वैदेशिक रोजगार विभागका महानिर्देशक डा. भीम कुमार भुसालबीच वैदेशिक रोजगारीको नाममा हुनसक्ने पेशालाई थप व्यवस्थित, मर्यादित र शोषणरहित बनाउन ६ बुँदे उद्देश्य र १३ बुँदे सहकार्य समझारीपत्रमा हस्ताक्षर भएको हो ।

गृह मन्त्रालयमा आइतबार आयोजित कार्यक्रममा वैदेशिक रोजगारीलाई थप वयवस्थित, मर्यादित र शोषणरहित बनाउन तथा वैदेशिक रोजगारको नाममा हुनसक्ने मानव बेचबिखन तथा ओसारपसार गर्ने कार्यलाई नियन्त्रण गर्ने त्यस्तो कार्यबाट पीडित व्यक्तिको संरक्षण तथा पुनर्स्थापना गर्न श्रम, रोजगार तथा समाजिक सुरक्षा मन्त्रालय, वैदेशिक रोजगार विभाग र नेपाल सरकार गृह मन्त्रालय र नेपाल प्रहरीबीच उक्त समझदारीपत्रमा हस्ताक्षर भएको हो । यस समझदारीबाट गैरकानुनी क्रियाकलाप नियन्त्रण गर्न पारस्परिक समन्वय गर्नु पर्ने उल्लेख छ ।