एक वर्षमा सगरमाथा क्षेत्रमा २३ विदेशीको मृत्यु

सोलुखुम्बु । पर्यटकीय जिल्ला सोलुखुम्बुमा एक आर्थिक वर्षमा झण्डै दुई दर्जन विदेशी पर्यटकले ज्यान गुमाएका छन् । गत आर्थिक वर्ष २०७९/८० मा सगरमाथा क्षेत्र भ्रमणमा आएका २३ जना विदेशी पर्यटकको ज्यान गएको हो ।

यस्तै, तीन जना बेपत्ता भएको जिल्ला प्रहरी कार्यालय सोलुखुम्बुको तथ्याङ्क छ । ज्यान गुमाउनेमा मेक्सिकोका पाँच जना, भारतका चार जना, फ्रान्स र क्यानडाका दुई/दुई जना, कोरिया, यूके, स्लोभाकिया, जापान, अस्ट्रेलिया, अमेरिका, माल्डोवा, मलेसिया, चीन र हंगेरीका एक/एक जना रहेका छन् ।

सगरमाथा क्षेत्र भ्रमणमा आएका उनीहरूले विभिन्न समयमा भवितव्यमा परेर ज्यान गुमाएको प्रहरीले जनाएको छ । पाँच जना मेक्सिकन नागरिकहरूले भने हेलिकोप्टर दुर्घटनामा ज्यान गुमाएको जिल्ला प्रहरी कार्यालयका सूचना अधिकारी प्रहरी निरीक्षक रामकिशोर शाहले जानकारी दिए । अस्ट्रेलिया, मलेसिया र सिंगापुरका एक/एक जना गरी तीन जना पर्यटक अझै बेपत्ता रहेको शाहले बताए । उनीहरू बेसक्याम्प क्षेत्रमा गत जेठ ५ गतेदेखि बेपत्ता छन् ।