दोलखाका हिमपात, पर्यटन भित्र्याउन थप राहत

सुबास बस्नेत
दोलखा, पुस २०
दोलखाका उच्च ठाउँमा पुनः हिमपात भएको छ । भ्रमण वर्ष २०२० सुरु भएको तेस्रो दिन हिमपात भएसँगै दोलखालाई पर्यटन भित्र्याउन थप राहत मिलेको छ । करिब दुई साताअघि मंसिरको अन्तिम साता परेको हिउँ पग्लिनुअगावै पुनः हिमपात भएको हो । दोलखाका उच्च भूभागहरुमा शुक्रबारदेखि हिमपात भइरहेको छ । शुक्रबार र शनिबार गरी करिब ३५ हजार पर्यटक दोलखा भित्रिएका छन् । अघिपछि सुनसानजस्तै देखिने शैलुङ र जिरीमा भ्रमण वर्ष सुरु हुनेबित्तिकै परेको हिउँले पर्यटकको बाक्लो चहलपहल देखाएको छ ।

कालिञ्चोक, शैलुङ, गौरीशंकर, जिरी र भीमेश्वरका उच्च ठाउँमा बाक्लो हिमपात भएको छ । यी लेकाली भेगमा हिमपात भएपछि सो क्षेत्रमा बसोबास गर्ने स्थानीयलाई भनी चिसोले सताएर दैनिक जनजीवनमा प्रभावित बनाएको छ । चिसोका कारण घरबाहिर निस्केर काम गर्ने वातावरण नभएको कालिञ्चोकका स्थानीय होटल व्यवसायीहरु बताउँछन् । उच्च ठाउँमा परेको हिमपातले तल्लो भेगमा पनि एक्कासि चिसो बढेको छ । दोलखा सदरमुकाम चरीकोट आसपासमा शनिबार पनि सामान्य झरी परिरहेको हुँदा चिसो थप बढेको छ । दोलखाको प्रसिद्ध कालिञ्चोक क्षेत्रमा हिउँ खेल्ने आन्तरिक पर्यटकको वृद्धि भएपछि सो ठाउँका होटल भरिभराउ भएका छन् । सदरमुकाम चरीकोट बजारमा पनि शुक्रबार परेको हिउँका कारण स्थानीय होटलहरुसँगै सडकमा ओहोरदोहोर गर्ने सवारीसाधन र घुम्न आउने मानिसको चहलपहल बाक्लो देखिएको छ ।

हिउँमा रमाउन आउने पर्यटकलाई आफ्नो स्थानीयस्तरमा तान्न दोलखा नौ स्थानीय तहले आफ्ना क्षेत्रमा रहेका पर्यटकीय तथा धार्मिक स्थलहरुको प्रसारप्रसार गरिरहेका छन् । स्थानीय तहहरुले आआफ्नो क्षेत्रबाट भ्रमण वर्ष २०२० लाई सफल पार्न र धेरै पर्यटक भित्र्याउन विभिन्न महोत्सवलगायत कार्यक्रमको आयोजना गरिरहेका छन् । भ्रमण वर्षको उपलक्ष्यमा कालिञ्चोक केबुलकारले पनि टिकटमा विशेष छुटको व्यवस्था मिलाएको छ । केबलकारको यात्रा गर्ने तीन जिल्लाका नागरिकलाई पाँच सय रुपैयाँको टिकट तीन सयमा दिने व्यवस्था गरेको छ । दोलखा, सिन्धुपाल्चोक र रामेछापका जिल्ला बासिन्दालाई सोमबार र बुधबार केबलकारको टिकटमा ४० प्रतिशत छुट दिने भएको हो ।