काठमाडौ, नेपाल–जापान कूटनीतिक सम्बन्ध स्थापनाको ७०औँ वार्षिकोत्सवको अवसरमा नेपाल–जापान समानता प्रदर्शनी हुने भएको छ ।
नेपाल चेम्बर अफ कमर्स र नेपाल एओटिएस एलुम्नाइ सोसाइटीले संयुक्त रुपमा विहीबार र शुक्रबार ललितपुरस्थित होटल हिमालयमा प्रदर्शनी गर्न लागेका हुन् । नेपालस्थित जापानी राजदूतावास, एओटीएस जापान र जापानिज चेम्बर अफ कमर्स एन्ड इन्डस्ट्री इन नेपालको सहयोगमा हुने कार्यक्रममा नेपाल–जापान समानता प्रदर्शनीसंगै जापानी चिया संस्कार प्रदर्शन, व्यापार तथा लगानी मेला, सेमिनार र प्यानल छलफल आयोजना गरिनेछ । प्रदर्शनीमा नेपाल र जापानबीचका संस्कृति, परम्परा, वास्तुकला, खानपान र सामाजिक मूल्यका समानता झल्काउने ७० वटा प्रदर्शनी सामग्री समावेश गरिनेछ । आगन्तुकले जापानको परम्परागत माचा चियासहित जापानी चिया संस्कार प्रत्यक्ष अनुभव गर्ने अवसर पनि पाउनेछन् ।
समारोहअन्तर्गत आयोजना हुने नेपाल–जापान व्यापार, लगानी तथा व्यापार मेलामा २० भन्दा बढी नेपाली तथा जापानी कम्पनी र संस्थाका करिब दुई दर्जन स्टल रहनेछन् । ती स्टलमा उत्पादन, सेवा, प्रविधि, नवप्रवर्तन तथा लगानीका अवसरहरू प्रदर्शन गरिनेछन् । यस अवसरमा २० सदस्यीय जापानी व्यवसायिक प्रतिनिधिमण्डल नेपाल आउनेछ। उनीहरूले नेपाली व्यवसायीसँग व्यापार, लगानी, प्रविधि हस्तान्तरण र साझेदारी विस्तारबारे छलफल गर्नेछन् ।
साथै, उच्चस्तरीय सेमिनार तथा प्यानल छलफलमा नेपाल र जापानका विज्ञ तथा उद्यमीहरूले द्विपक्षीय आर्थिक सहकार्यका सम्भावनाबारे विचार आदान–प्रदान हुनेछ । कार्यक्रममा ३ हजारभन्दा बढी आगन्तुक सहभागी हुने अपेक्षा गरिएको छ । आयोजकका अनुसार समारोहले नेपाल–जापानबीचको ७० वर्षे मित्रता, सांस्कृतिक सम्बन्ध, व्यापार र लगानी सहकार्यलाई थप मजबुत बनाउने विश्वास गरिएको छ ।
