नेपाली युवा उद्यमी मञ्चको वार्षिकोत्सव

काठमाडौं । नेपाली युवा उद्यमी मञ्चले आफ्नो २० औँ वार्षिकोत्सव मनाएको छ । नेपालभर युवा उद्यमशीलता प्रवर्द्धनमा दुई दशक समर्पित रहेको दाबी गर्ने मञ्चले वार्षिकोत्सव मनाएको हो । २००३ मा नेपालमा द्वन्दकाल चलिरहेको बेला उद्यमी गौरव अग्रवालको अध्यक्षतामा पाँच युवा उद्यमीद्वारा मञ्चको स्थापना गरिएको थियो ।

मञ्चले देशभरका युवा उद्यमीहरूको उद्यमशील परिदृश्यलाई आकार दिन महत्वपूर्ण भूमिका खेल्दै आएको छ । मञ्चले उद्यमीहरूलाई सशक्तीकरण गर्न र महत्वाकांक्षी उद्यमीहरूलाई फस्टाउन र सफल हुन प्लेटफर्म पनि प्रदान गर्दै आएको छ । मञ्चले २० वर्षको अवधिमा युवा सशक्तीकरण, नीति एड्भोकेसी, मेन्टरसीप कार्यक्रम, च्याप्टर विस्तार, उद्यमशीलता शिक्षा, मेड इन नेपाल अभियानलगायतका कार्यक्रम सञ्चालन गरेको छ । मञ्चले युवा उद्यमीहरूलाई सशक्तीकरण गर्न उद्यमशीलता र आर्थिक वृद्धिको लागि अनुकूल वातावरण सिर्जना गरी, नीति सुधारको वकालत गर्दै आएको छ । यस्तै, उद्धमशीलता सिक्न इच्छुक विद्यार्थीसँग अनुभवी व्यवसायीलाई जोड्दै, धेरै मेन्टरसिप कार्यक्रम समेत आयोजना गरेको जनाएको छ । मञ्चकी अध्यक्ष सुश्री सहारा जोशीले नेपाली युवा उद्यमीहरूको आगामी पुस्तालाई सशक्तीकरण गर्ने प्रतिबद्धतालाई सुदृढ पार्न तत्पर रहेको बताइन् ।