बंगलादेशलाई विश्व बैंकले २० करोड डलर सहयोग गर्ने

अमेरिका । विश्व बैंकले बंगलादेशलाई स्वास्थ्य क्षेत्रमा काम गर्न २० करोड अमेरिकी डलर सहयोग गर्ने भएको छ । बंगलादेशमा प्राथमिक स्वाास्थ्य सेवा सुधार, सामान्य रोगको उपचार तथा रोकथाम र चिकित्सा फोहोरमैला व्यवस्थापनका लागि सो रकम सहयोग स्वीकृत गरेको हो ।

विश्व बैंकले बुधबार प्रकाशित गरेको एक विज्ञप्तिअनुसार यो रकमबाट सहरी क्षेत्रका पाँच वर्षमुनिका २५ लाख बालबालिकाले सेवा पाउने विश्वास गरेको छ । रकम सहरी स्वास्थ्य, पोषण र जनसंख्या परियोजनामार्फत खर्च हुने छ । प्राथमिक स्वास्थ्य केन्द्रहरूको सञ्जाल स्थापना गर्न, पोषण र स्वास्थ्य सेवालगायतका कार्यक्रममा रकम प्रयोग हुने बताइएकोे छ ।

बंगलादेश र भुटानका लागि विश्व बैंकका देशीय निर्देशक अब्दुलाय सेकले बंगलादेशमा ग्रामीण क्षेत्रको स्वास्थ्य सेवा सुधारमा प्रगति गरिसकेकाले सहरी क्षेत्रमा केन्द्रित सहयोग गरिएको बताए । उनले सहरी क्षेत्रका गरिब र सुकुमबासी बस्तीका बासिन्दाहरूलाई निजी स्वास्थ्य केन्द्रहरूमा महँगो सेवा लिनुपर्ने बाध्यता रहेको बताए । यस्तै उच्च जनघनत्व, जलवायु परिवर्तन र तीव्र सहरीकरणका कारण नयाँ स्वास्थ्य चुनौतीहरू देखा परिरहेको उनले बताए । यस परियोजनाले महिलाहरूको लागि प्रसवपूर्व सेवाहरूमा सुधार गर्ने विश्वास गरिएको छ ।