ट्विटरमा अडियो र भिडियो कल गर्न मिल्ने

अमेरिका । सामाजिक सञ्जाल प्लेटफर्म ‘एक्स’ (ट्विटर)का प्रयोगकर्ताहरूले अब अडियो र भिडियो कल गर्न पाउने भएका छन् । एक्सका मालिक एलोन मस्कले आफ्नो फोन नम्बरविनै एक्समार्फत अडियो र भिडियो कल गर्न मिल्ने फिचर थप गर्न लागेको जानकारी गराएका छन् ।

मस्कले यस एपलाई ‘सुपर एप’मा रूपान्तरण गर्ने आफ्नो भिजन रहेको बताउँदै आएका छन् । सोहीअनुरूप अडियो र भिडियो कल गर्ने फिचर छिट्टै थप्न लागेको बताएका हुन् । मस्कका अनुसार अडियो र भिडियो कल सुविधा आईओएस, एन्ड्रोइड, म्याक र पीसी उपकरणहरूमा उपलब्ध हुनेछ । मस्कले प्रयोगकर्ताहरूले फोन नम्बरविनै अडियो र भिडियो कल गर्न पाउने फिचरले सञ्चारमा क्रान्तिकारी परिवर्तन गर्ने दाबी गरेका छन् ।