आर्थिक संकटबीच सिरियाली बालबालिका विद्यालय फर्किए

एजेन्सी । युद्ध, विनाशकारी भूकम्प र गहिरो आर्थिक संकटको सामना गर्दै सरकार नियन्त्रित क्षेत्रमा रहेका करिब ४० लाख सिरियाली विद्यार्थी आइतबार विद्यालय फर्केका छन् । तर, संयुक्त राष्ट्र संघका अनुसार धेरै शैक्षिक सुविधाहरू क्षतिग्रस्त वा नष्ट भएको र ९० प्रतिशत मानिस गरिबीको रेखामुनि रहेको देशमा धेरै बालबालिकालाई राख्ने कक्षाकोठा समेतको अभाव छ ।

सिरियाको शिक्षा मन्त्रालयले शनिबार विद्यालयहरूलाई विद्यार्थीहरूको लागि आवश्यक लगानी कम गर्न ‘विद्यालय पोशाकका लागि कडा नियम लागू नगर्न आग्रह गरेको राज्य सञ्चालित समाचार संस्था, सानाले जनाएको छ । सानाले भनेको छ, ‘देशले सामना गरिरहेको कठिन आर्थिक अवस्थालाई ध्यानमा राख्दै र जनसंख्यामा वित्तीय बोझ कम गर्ने प्रयासको एक भागको रूपमा यी उपायहरू प्रस्तुत गरिएको छ ।’

करिब ३७ लाखभन्दा बढी विद्यार्थीका लागि १४ हजार पाँच सय पाँच विद्यालयबाट पठनपाठन गराउने गरी शैक्षिक सत्र २०२३/२०२४ सुरू भएको छ । सिरियामा सन् २०११ पछि भएको रक्तपातपूर्ण द्वन्द्वका कारण पाँच लाखभन्दा बढीको ज्यान गइसकेको छ, लाखौँ मानिस विस्थापित भएका छन् र देशलाई आर्थिक संकटमा धकेलेको छ ।

युद्धले शैक्षिक पूर्वाधारको व्यापक विनाश गरेको छ जसले गर्दा शैक्षिक सुविधाहरूमा असर पारेको छ । धेरै विद्यालय भवनहरू भत्किएका छन् र कैयौँ आश्रयस्थलहरूमा परिणत भएका छन् । गत फेब्रुअरीमा गएको भूकम्पका कारण शिक्षा क्षेत्रमा अनुमानित दुई सय ७७ मिलियन डलरको क्षति पु-याएको छ । अहिले सिरियामा विद्यालय जाने उमेरसमूहका एक तिहाइ अर्थात् २४ लाख बालबालिका विद्यालय गएका छैनन् ।