चीनको अर्थतन्त्रमा सुधार

बेइजिङ । चीनको अर्थतन्त्र अपेक्षा गरिएभन्दा छिटो बढिरहेको बताइएको छ । चीनको कुल गार्हस्थ्य उत्पादन (जीडीपी) सन् २०२३ को पहिलो तीन त्रैमासिकमा वार्षिकरुपमा पाँच दशमलव दुई प्रतिशतले विस्तार भएको छ । गत बुधबार सार्वजनिक भएको यो तथ्यांक अपेक्षा गरिएभन्दा राम्रो भएको चिनियाँ अधिकारीहरुको दाबी छ ।

पहिलो तीन त्रैमासिकको वृद्धिले चीनको करिब पाँच प्रतिशत आर्थिक वृद्धिको लक्ष्य हासिल गर्न बलियो आधार तयार भएको बताइएको छ । राष्ट्रिय तथ्यांक विभागका उपप्रमुख शेङ लाययुनले तेस्रो त्रैमासिक जीडीपी चार दशमलव नौ प्रतिशतले विस्तार भएको बताएका छन् । विश्लेसकहरुले भने चार दशमलव चार प्रतिशतको मात्रै वृद्धि अपेक्षा गरेका थिए ।

जेएलएल ग्रटर चाइनाका प्रमुख अर्थशास्त्री ब्रुस प्याङले यो रिकभरीले चिनियाँ अर्थतन्त्रलाई थप सुरक्षित चरणमा पु-याएको बताए । उनले औद्योगिक उत्पादन अपेक्षा गरिएभन्दा धेरै बढेको बताए ।

जनवरीदेखि सेप्टेम्बरसम्म स्थिर–सम्पत्तिमा लगानी वार्षिक तीन दशमलव एक प्रतिशतले बढेको छ । औद्योगिक उत्पादनको मूल्यवृद्धि चार प्रतिशत र उपभोग्य वस्तुको खुद्रा बिक्री छ दशमलव आठ प्रतिशतले बढेको छ । यस्तै सेप्टेम्बरमा सहरी बेरोजगारी दर शून्य दशमलव दुई प्रतिशत विन्दुले घटेर पाँच प्रतिशतमा झरेको छ । एजेन्सी