भगवती लेमिनेट्सको शंकास्पद आगलागी प्रकरणमा शिखर इन्स्योरेन्सको स्वीकृति

झापाको मेचीनगरस्थित ज्यामिरगढीमा रहेको भगवती लेमिनेट्समा भएको शंकास्पद आगलागीमा इन्स्योरेन्स गर्ने कम्पनी शिखर इन्स्योरेन्स कम्पनी लिमिटेडले स्वीकृति दिएको छ । लेमिनेट्समा गत फागुन २८ गते बिहानै भयानक आगलागी भएको थियो । आगलागीको विस्तृत विवरण नआउँदै इन्स्योरेन्स गर्ने कम्पनी शिखर इन्स्योरेन्सले विस्तृत छानबिनअघि नै क्षतिपूर्ति दिने प्रक्रिया अगाडि बढाएसँगै लेमिनेट्सको शंकाष्पद आगलागीमा इन्स्योरेन्स कम्पनीको समेत संलग्नता हुन सक्ने आशंका गरिएको छ ।

स्रोतका अनुसार शिखर इन्स्योरेन्सका अध्यक्ष गौरभ अग्रवाल र प्रमुख कार्यकारी अधिकृत (सीईओ) दिपप्रकाश पाण्डेको दबाबमा विस्तृत अनुसन्धान नहुँदै क्षतिपूर्ति दिने तयारी भएपछि सीईओ पाण्डेको भगवती लेमिनेट्ससँग विशेष सम्बन्ध रहेको आशंका गरिएको छ ।स्रोतका अनुसार मिलेमतोमा गरिएको आगलागीमा उद्योगको महत्वपूर्ण सामानहरू निकालिएको र अन्य मुख्य संरचनाहरू जलेर ध्वस्त भएका थिए । घना आवादी भएको गाउँको मध्यभागमा रहेको उद्योगमा भएको आगलागीले सिंगो गाउँ त्रसित बनेको थियो । बिहान लागेको आगो निभाउन दुई दिन लागेको थियो । राजस्व विभागको छानबिन छल्न उद्योगमा नक्कली आगलागी गराइएको स्रोतको दाबी छ । स्रोतका अनुसार लेमिनेट्समा हुने गरेको कच्चा र पक्का बिलको कारोबार र राजस्व विभागको छानबिनसमेत प्रभावित पार्नेगरी नक्कली आगलागी गराइएको थियो । उद्योगले करोडौं राजस्व हिनामिनाको थप अनुसन्धान नहोस् भनेर आगलागी गराइएको स्रोतको दाबी छ ।

त्यस्तै, बीमा कम्पनीको समेत मिलेमतोमा बीमाबापत आउने करोडौं रकम पचाउन खाली गोदाममा नक्कली आगलागी गरिएको स्रोतले दाबी गर्दै आएको छ । लेमिनेट्सका मुख्य सञ्चालक रजनीश कर्नानीलगायतको योजनामा नै उद्योगमा आगलागी भएको स्रोतले दाबी गरेको छ । कम्पनीले ठूलो क्षति भएको बताए पनि आगलागी हुनुअगाडि सम्पूर्ण मूल्यवान् सामानहरू गोदामबाट निकालिएको स्रोत बताउँछ । स्रोतका अनुसार कबाडी सामानहरू मात्र भएको अवस्थामा उद्योगमा आगलागी भएको थियो ।

लामो समयदेखि प्लाइउडको व्यापार गर्दै आएको भगवती लेमिनेट्सले वार्षिक एक अर्बभन्दा बढी कारोबार गर्ने कम्पनीले सरकारी संयन्त्रको आँखा छल्न कच्चा बिल अर्थात् नर्मल बिल र पक्का बिल अर्थात् भ्याट बिल गर्ने कार्यालयसमेत छुट्टाछुट्टै राखी कारोबार गर्दै आएको थियो । झापामा रहेको लेमिनेट्सको दुईवटा कार्यालयमध्ये मेचीनगरमा पक्का बिलको कारोबार गरी धुलाबारीमा रहेको अर्को कार्यालयबाट कच्चा बिलबाट कारोबार हुने गरेको स्रोत बताउँछ । नेपाली लगानीकर्ताको भनेर उद्योग खोले पनि मूल लगानीकर्ता भने भारतीय रहेका छन् । दोहोरो बिलको फण्डा खुल्नासाथ फसाउनकै लागि नेपालीहरूलाई हैसियतविनाको मालिक बनाएर राखिएको स्रोत बताउँछ ।

गत वर्ष मात्र राजस्व हिनामिनामा भगवती लेमिनेट्स उद्योगका तत्कालीन सञ्चालकहरू रजनीश कर्नानी, सन्तोष आचार्य, रतनलाल अग्रवाल, निर्मला कर्नानी, निर्मला सरिया, दीपेन्द्रकुमार अग्रवाल र रतनकुमार अग्रवाललगायतलाई राजस्व अनुसन्धान विभागले अनुसन्धानसमेत गरेको थियो । लामो समयसम्म अनुसन्धान गर्नुपर्ने फाइलहरू रोकिएपछि तत्कालीन समयमा राजस्व अनुसन्धान विभागको नियतमाथि समेत प्रश्न उठेको थियो । राजस्व चुहावट अनुसन्धान तथा नियन्त्रण ऐन २०७६ अनुसार राजस्व चुहावटको कसुर गरेमा त्यस्ता व्यक्ति र कम्पनीलाई बिगोको शतप्रतिशत जरिवाना वा कसुरको मात्रा हेरी पाँच वर्षसम्म कैद सजाय गर्ने व्यवस्था छ ।

ऐनअनुसार एक करोडसम्मको बिगोमा एक महिनादेखि छ महिनासम्म कैद हुने व्यवस्था छ । यसैगरी एक करोडदेखि पाँच करोड रुपैयाँसम्मको बिगोमा छ महिनादेखि एक वर्षसम्म कैद हुने व्यवस्था छ । त्यस्तो व्यक्तिबाट बिगो असुल वा जफत गरिने उल्लेख छ । तर यो सजाय भएन । उद्योग सन् २०१६ मा स्थापना भएको हो । १४ सय मजदुरले काम गर्ने यो उद्योगमा आधा दर्जनभन्दा बढी सञ्चालक छन् । विष्णु मधगोरिया र रजनीश कर्नानी भगवती लेमिनेट्सका मुख्य सञ्चालक हुन् ।