पेट्रोलियम पदार्थमा देउवा सरकारको चमत्कार

काठमाडौं । पेट्रोलियम पदार्थको मूल्यमा शेरबहादुर देउवा नेतृत्वको सरकारले चामत्कारिक निर्णय गरेको छ । गत साता डिजेल, पेट्रोल र मट्टितेलमा प्रतिलिटर दश रुपैयाँ मूल्य घटाएको सरकारले बिहीबार रातिदेखि फेरि प्रतिलिटर १२ रुपैयाँ मूल्यवृद्धि गरेको छ ।

मूल्य घटाउँदा नेपाल आयल निगमले इन्डियन आयल कर्पोरेसन (आईओसी)लाई किस्ता तिर्न रकम नपुगेको भन्दै निगम सञ्चालक समितिलाई देउवा सरकारले मूल्यवृद्धि गर्न स्वीकृत दिएपछि बिहीबार रातिदेखि पेट्रोलियम पदार्थको मूल्यवृद्धि भएको हो ।

निगम सञ्चालक समितिको बैठकले बिहीबार राति १२ बजेदेखि पेट्रोलमा प्रतिलिटर आठ र डिजेल/मट्टितेलमा प्रतिलिटर १२ रुपैयाँ वृद्धि गरेको हो । मूल्य बढेसँगै पेट्रोलको खुद्रा मूल्य प्रतिलिटर १७८ र डिजेल/मट्टितेलको मूल्य प्रतिलिटर १६५ रुपैयाँ पुगेको छ । निगमले खाना पकाउने एलपी ग्यास र हवाइ इन्धनको मूल्य भने यथावत् राखेको छ ।

बुधबारसम्म निगमले आईओसीलाई २० अर्बभन्दा बढी रकम तिर्न बाँकी छ । निगमले प्रत्येक अंग्रेजी महिनाको ८ र २३ तारिखमा आईओसीलाई पेट्रोलियम पदार्थ खरिद गरेबापतको रकम भुक्तानी गर्दै आएको छ ।

अन्तर्राष्ट्रिय बजारमा उच्च दरले पेट्रोलियम पदार्थको मूल्यवृद्धि भएको र आईओसीलाई तिर्नुपर्ने बक्यौता रकम बढ्दै गएकाले मूल्यवृद्धि गर्नुपरेको निगमले विज्ञप्ति प्रकाशित गरी जानकारी गराएको छ । मूल्य समायोजनपछि पनि पाक्षिकरुपमा तीन अर्ब ८९ करोड घाटा रहँदै आएको निगमको भनाइ थियो ।