लगातार आधा घण्टा पानी परेपछि जलेश्वर जलमग्न

जलेश्वर (महोत्तरी) । शुक्रबार करिब १०ः३० बजेदेखि ११ बजेसम्म परेको भारी वर्षाका कारण महोत्तरी जिल्लाको सदरमुकाम जलेश्वर जलमग्न भएको छ । लगातार आधा घण्टा मुसलाधारे पानी परेपछि जलेश्वरभरी पानी पानी भएको छ भने वर्षाका कारण जलेश्वरको सबै सडक पनि डुबेको छ ।

तीव्र गति र ठूलो ठूलो थोपासहित परेको पानीले यहाँका जिल्ला अदालत, जिल्ला प्रहरी, कारागार, जिल्ला प्रशासन, मालपोत र जलेश्वर नगरपालिकाको कार्यालयमा जाने सम्पूर्ण बाटो डुबानमा परेका छन् भने कतिपय कार्यालयको परिसरमा पानी जमेको छ ।

पानीका कारण बाटोमा सवारी साधन गुडाउन समस्या भएपछि कार्यालयमा कामकाजका लागि आउजाउ गर्ने सेवाग्राहीसमेत मारमा परेका छन् । लामो समयदेखि पानी नपरेका कारण नगरभित्रको सम्पूर्ण ढल जाम भएर जलेश्वर अहिले जलमग्न भएको हो । पानीको निकासका लागि विभिन्न स्थानमा स्काभेटर तथा डोजर लगाइएको छ ।