काठमाण्डौं,चैत १७
कोरोना भाइरस (कोभिड—१९) को संक्रमण फैलिन नदिन भन्दै सरकारले गत मंगलबार अर्थात् ११ गतेदेखि लगाएको ‘लकडाउन’ अर्थात् बन्द यही चैत २५ गते राति १२ बजेसम्मका लागि लम्ब्याएको छ । १० गते सरकारले राजपत्रमा सूचना जारी गरी ११ गते बिहान ६ बजेदेखि १८ गते बिहान ६ बजेसम्मका लागि लगाएको ‘लकडाउन’ नेपालमा कोरोना संक्रमितको संख्या बढ्न थालेपछि थप विस्तार गरेको हो । दोस्रो व्यक्तिमा कोरोना देखिएपछि सरकारले ११ गतेदेखि ‘लकडाउन’ गरेको थियो । अहिले पाँच जनामा कोरोना देखिएको छ भने बुटवलमा आइसोलेसनमा रहेका एक युवाका मृत्यु भएपछि संक्रमण बढेको आशंका गरिएको छ । यद्यपि ती युवाको के कारणले मृत्यु भएको भन्ने पुष्टि स्वाब परीक्षणबाट मात्र पत्ता लाग्नेछ । मृत्यु भएका युवाको स्वाब परीक्षणको लागि काठमाडौंको टेकु अस्पताल ल्याइएको छ । आइतबार नै कोरोना रोकथामसम्बन्धी उच्चस्तरीय समन्वय समितिको बैठकले ‘लकडाउन’को अवधि थप गर्नुपर्ने निर्णय गर्दै मन्त्रिपरिषद् बैठकमा प्रस्ताव लैजाने निर्णय गरेको थियो । मन्त्रिपरिषद् बैठकपछि सरकारका प्रवक्ता अर्थ तथा सञ्चारमन्त्री डा. युवराज खतिवडाले ‘लकडाउन’को अवधि २५ गतेसम्मका लागि बढाइएको सञ्चारकर्मीहरुलाई जानकारी दिएका हुन् ।
सरकारले अन्तर्राष्ट्रिय सीमा नाकाबाट यात्रु आवागमन यसअघि लगाइएको रोक २५ गते राति १२ बजेसम्म कायमै राख्ने निर्णय पनि गरेको छ । सरकारले १० प्रतिशत छुटमा खाद्य सामग्री बिक्री गर्ने निर्णय पनि गरेको छ । बैठकले खाद्य व्यवस्था तथा व्यापार कम्पनी लिमिटेड र साल्ट ट्रेडिङ कर्पोरेसनले चामल, पिठो र नुनमा हाल कायम रहेको मूल्यमा दश प्रतिशत छुटमा बिक्री गर्ने निर्णय गरेको हो । यस्तै, बैठकले टेलिफोन सेवा कम्पनीले लकडाउनको अवधिमा डाटा तथा इन्टरनेटमा २५ प्रतिशत छुट दिने व्यवस्था गरेको छ भने नेपाल विद्युत् प्राधिकरणले मासिक एक सय ५० युनिटसम्म बिजुली खपत गर्ने ग्राहकलाई विद्युत् महसुलमा २५ प्रतिशत छुट दिने निर्णय पनि गरेको छ । विद्युत् र इन्टरनेटको फागुन र चैत महिनाको महसुलमा २०७७ वैशाख मसान्तसम्म बुझाएमा विलम्ब र अरु जरिवाना नलिने निर्णय गरेको छ । विदेशबाट आउने विमानलाई आउँदो वैशाख ३ गतेसम्मका लागि थप प्रतिबन्ध लगाइएको छ । सरकारले आगामी वैशाख ३ गतेसम्मका लागि अन्तर्राष्ट्रिय हवाइ उडान रोक्ने निर्णय गरेको छ । कोभिड १९ संक्रमण, रोकथाम तथा नियन्त्रण उच्चस्तरीय समन्वय समितिको आज सिंहदरबारमा बसेको बैठकले कोरोनाका संक्रमणको त्रास कायम रहेको अवस्थालाई ध्यानमा राखेर हवाइ उडान रोक्ने निर्णय गरेको हो ।
सरकारले यसअघि चैत ८ देखि १८ गतेसम्म हवाइ उडान रोक्ने निर्णय गरेको थियो । कोरोनाको संक्रमणको त्रास बढेपछि सरकारले पूर्ववत् निर्णयअनुसार नै अन्तर्राष्ट्रिय हवाइ उडानमा रोक लगाउन समय थप गरेको हो । बैठकपछि प्रधानमन्त्री तथा मन्त्रिपरिषद् कार्यालयका सचिव नारायणप्रसाद बिँडारीले भने, ‘कोरोना संक्रणको त्रास कायम रहेकाले हवाइ उडान रोक्ने निर्णय भएको छ ।’कोरोना भाइरसबाट पीडितलाई राहत दिन सरकारले २२ अर्ब बढी वैदेशिक ऋण लिने निर्णय पनि गरेको छ । अन्तर्राष्ट्रिय मुद्राकोषबाट निब्र्याजी ८७ दशमलव पाँच मिलियन अर्थात् १३ खर्ब नौ करोड विश्व बैंकबाट २९ मिलियन, एसियाली विकास बैंकबाट ५० मिलियन अमेरिकी डलर सहयोग स्वीकार गर्ने निर्णय सरकारले गरेको छ ।त्यस्तै सरकारले ५० हजार डलरभन्दा माथि मूल्यका गाडी खरिद गरेर आयातमा रोक लगाएको छ । मदिरा आयातमा पनि रोक लगाएको छ । माध्यमिक तहसम्म निजी स्कुल, कलेज पनि एक महिनाको शुल्क छुट दिनुपर्ने सरकारले निर्णय गरेको छ ।
क्याटेगोरी : समाचार
ताजा अपडेट
- पाठ्यक्रममै प्रविधिको विकास गरौँ
- पूर्वपश्चिम राजमार्गअन्तर्गत बागमती पुल जीर्ण बनेपछि दुर्घटनाको जोखिम
- धरौटिमा छुटे दिपेश पुन
- अर्थमन्त्री पुनको उपस्थितिमा नेपाल र चीनबीच दुई सम्झौतामा हस्ताक्षर
- नेपालमा अर्थतन्त्रका चुनौतीहरू
- भूकम्पका दश वर्ष पुनर्निर्माण अलपत्र
- प्रधानमन्त्रीसँग चिनियाँ अन्तर्राष्ट्रिय विकास सहयोग एजेन्सीका अध्यक्षको शिष्टाचार भेट
- लाभांश बाड्न नसक्ने अवस्थामा फाइनान्स कम्पनीहरु
धेरैले पढेको
- समसामयिक राजनीतिक व्यङ्ग्य
- राजेन्द्र विमल र हरिहर शर्मालाई पुरस्कृत गरिने
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- एक्सेल डेभलपमेन्ट बैंकको ट्राफिक प्रहरीलाई सहयोग
- चिया पसल पनि कम्पनी ?
- इन्फिनिटी लघुवित्तको सातै प्रदेशमा तालिम सम्पन्न
- नेकपा माओवादी केन्द्र कंचनपुर-काठमाडौ सम्पर्क समन्वय समितिको पाचौं भेला सम्पन्न
तपाईको प्रतिक्रिया