दोहोरो आर्थिक वृद्धिका लागि एकल दरको ब्याजदर कायम गर्न चेम्बरको आग्रह

काठमाडौं । नेपाल चेम्बर अफ कमर्सले दोहोरो आर्थिक वृद्धिका लागि एकल दरको ब्याजदर कायम गर्न नेपाल राष्ट्र बैंकलाई आग्रह गरेको छ । आगामी आर्थिक वर्ष २०७९/०८० को मौद्रिक नीतिका लागि राष्ट्र बैंकलाई १७ बुँदे सुझाव पेश गर्दै चेम्बरले ब्याजदर एकल अंकमा कायम गर्न माग गरेको हो । यस्तै चेम्बरले तरलता व्यवस्थापनका लागि पुँजीगत खर्च समयमै गर्ने व्यवस्था गर्न माग गरेको छ । खर्च हुन नसकी सरकारी ढुकुटीमा रहेको पुँजीलाई वाणिज्य बैंकमार्फत प्रवाह गरी अर्थतन्त्रलाई चलायमान बनाउन पनि चेम्बरले आग्रह गरेको छ ।

यस्तै विगतका वर्षहरुमा झैँ सीसीडी रेसियो ८५ प्रतिशत वा सीडी रेसियोलाई विद्यमान ९० प्रतिशतलाई ९५ प्रतिशत पु-याउन पनि चेम्बरले आग्रह गरेको छ । भारतीय पर्यटकले नेपाल भ्रमण गर्दा साथमा राख्न पाउनुपर्ने हालको २५ हजार रुपैयाँको सीमालाई दुई लाख ५० हजार पु-याउन एवं पाँच सय दुई हजार रुपैयाँको नोटलाई सहज रुपमा सटहीको व्यवस्था गर्नुपर्ने चेम्बरको माग छ ।

एलसी कारोबारमा शतप्रतिशत मार्जिनको व्यवस्थाले उद्योगी व्यवसायीको कारोबार क्षमतामा तीव्र ह्रास आउने तथा वस्तु तथा सेवाको आयात लागतमा वृद्धि भई महङ्गी समेत बढ्ने भएकाले शतप्रतिशत मार्जिनमा ब्याज दिने व्यवस्था गर्न पनि चेम्बरले सुझाव दिएको छ । अनौपचारिक क्षेत्रमा रहेको पुँजीलाई बैंकिङ प्रणालीमा ल्याउनका लागि मौद्रिक नीतिमार्फत प्रोत्साहन गर्न समेत चेम्बरले आग्रह गरेको छ । सेयर कारोबारमा कर्जा प्रवाहका लागि हाल कायम चार करोड र १२ करोड रुपैयाँको सिलिङ हटाउनुपर्ने चेम्बरको ठहर छ ।

बैंक, वित्तीय संस्थामा सर्वसाधारणको पहुँचलाई सहज र सरलीकरण बनाउन एवं आवश्यक निवेदन, भौचरलगायतका कागजात समान ढंगको बनाउन समेत चेम्बरले आग्रह गरेको छ । अर्थतन्त्रको विद्यमान समस्या, विदेशी मुद्राको सञ्चितिमा परेको दबाब एवं तरलता व्यवस्थापन लगायत विभिन्न विषय समेटेर चेम्बरका अध्यक्ष राजेन्द्र मल्लले राष्ट्र बैंकका गभर्नर महाप्रसाद अधिकारीलाई सुझाव पेश गरेका हुन् ।

गभर्नर अधिकारीलाई सुझाव पेश गर्ने क्रममा अध्यक्ष मल्लले शिथिल रहेको अर्थतन्त्रलाई मौद्रिक नीतिले सम्बोधन गर्नुपर्ने बताए । बजेटमा उल्लिखित आठ प्रतिशतको आर्थिक वृद्धि र मूल्यवृद्धि सात प्रतिशतमा सीमित गर्नु निकै चुनौती हुने अध्यक्ष मल्लको भनाइ छ ।

कर्जा प्रवाह गर्दा विगतमा बेस रेटमा शुन्य दशमलव २५ प्रतिशतसम्म प्रिमियम लिने व्यवस्था गरिएकोमा हाल चारदेखि पाँच प्रतिशत पु¥याइएको भन्दै अध्यक्ष मल्लले सो व्यवस्था संशोधन गरी अधिकतम दुई प्रतिशतमा झार्न माग गरे । यस्तै उनले सेयरबजारलाई उकास्ने गरी मौद्रिक नीतिले सम्बोधन गर्नुपर्ने बताए । सेयरबजार व्यवस्थित हुन नसक्दा अधिकांश साना लगानीकर्ता समस्यामा परेको उनको भनाइ छ ।