कैदमाफीका रिगललाई जेल चलानको माग गर्दै महिला अधिकारकर्मीद्वारा प्रदर्शन

काठमाडौं । सरकारबाट कैदमाफी पाएका योगराज ढकाल(रिगल)लाई पुनःथुनामा राख्न माग गर्दै महिला अधिकारकर्मीहरुले प्रदर्शन गरेका छन् । अधिकारकर्मीहरुले संविधान दिवस(असोज ३ गते)को अवसरमा रिगलले पाएको कैद माफी फिर्ता लिई जेल चलान गर्न माग गर्दै काठमाडौंको माइतीघरमा प्रदर्शन गरेका हुन् ।

महिला अधिकारकर्मी अञ्जु केसी श्रेष्ठले यो घटनाले संविधानको धज्जी उडाएकाले आफूहरु प्रदर्शनमा उत्रिनु परेको बताइन् भने आन्दोलनकर्मी कल्पना बस्नेतले भारती(मृतक चेतन मानन्धरकी पत्नी)ले न्याय पाउनुपर्ने र महिलामाथि हिंसा गर्न नहुने बताइन् ।

रिगललाई कैद मिनाह दिइएको भन्दै त्यसको विरोधमा मृतककी पत्नी भारती मानन्धर माइतीघरमा अनसनरत छिन् । नेपालगञ्जका चेतन मानन्धरको हत्या आरोपमा रिगल अदालतबाट दोषि ठहर भइ जेल परेका थिए । खुँडा प्रहार गरेर व्यक्ति हत्या गरेको अभियोगमा जन्मकैदको सजाय पाएका रिगललाई सरकारले संविधान दिवसको अवसर पारेर कैद मिनाहा गरेको छ ।