काठमाडौं ।
नेपालमा पछिल्लो समय भीडभाड बढ्न जाँदा कोरोना संक्रमण फैलिने जोखिम बढेको छ । परीक्षणको संख्या घट्दा कोरोना संक्रमितको संख्या घटे पनि वास्तविक रुपमा कोरोना लाग्नेको संख्या पहिलाको जस्तै देखिएको छ । विभिन्न राजनीतिक दलहरुले काठमाडौंलगायत देशका विभिन्न सहर र गाउँ तथा नगरपालिका केन्द्रमा राजनीतिक भीड जम्मा गर्दा कोरोना फैलिने जोखिम बढेको हो ।
नेपालमा अझै पनि कोरोनाको भ्याक्सिन नआएको कारण समुदायमा फैलिनासाथ नियन्त्रण गर्न सकिने अवस्था छैन । तर, राजनीतिक दलहरुले भीडभाड बढाउने कार्य जारी राखेका छन् । ‘चिसो मौसममा काठमाडौंमा अरु बेला पनि रोग बढ्ने गरेको थियो’, स्वास्थ्य तथा जनसंख्या मन्त्रालयका एक अधिकारीले भने, ‘अहिले दलहरुले भीडभाड जम्मा गरेर कार्यक्रम गरिराखेको कारण कोरोनालगायतका रोग बढ्ने प्रबल सम्भावना छ ।’ अझ प्रधानमन्त्री नै यस्तो भीड जम्मा गर्ने काममा लागेपछि अरुले भीड जम्मा गर्ने होड नै चलेको छ ।
यसैबीच, देशभर सोमबार थप चार सय तीन जनामा कोभिड–१९ को सङ्क्रमण पुष्टि भएको छ । स्वास्थ्य तथा जनसङ्ख्या मन्त्रालयका अनुसार पछिल्लो समय चार हजार ४ सय १ जनाको स्वास्थ्य परीक्षण गर्दा १ सय ५९ महिला र २ सय ४४ पुरुष गरी सो सङ्ख्यामा सङ्क्रमण पुष्टि भएको हो । सोमबारसम्म नेपालमा कोरोना भाइरस सङ्क्रमितको सङ्ख्या दुई लाख ६२ हजार २ सय ६२ पुगेको छ । त्यस्तै पछिल्लो समय थप ५ सय ९४ निको भएका छन् । योसँगै निको हुनेको सङ्ख्या दुई लाख ५५ हजार ८८ (९७.३ प्रतिशत) रहेको मन्त्रालयले जनाएको छ ।
अहिले देशभर पाँच हजार २ सय ८९ सक्रिय सङ्क्रमित छन् । उनीहरूमध्ये ३ सय ४२ जना क्वारेन्टाइनमा रहेका छन् भने अन्य आइसोलेसनमा छन् । हालसम्म १९ लाख ५२ हजार ९ सय ३ जनाको पीसीआर परीक्षण भएको छ । पछिल्लो २४ घण्टामा काठमाडौँ उपत्यकामा ८२ महिला र १ सय ३ पुरुष गरी १ सय ८५ जनामा कोरोना भाइरस सङ्क्रमण पुष्टि भएको छ । हालसम्म कोरोनाबाट मृत्यु हुनेको सङ्ख्या एक हजार ८ सय ८५ पुगेको छ भने पछिल्लो २४ घण्टामा थप सात जनाले ज्यान गुमाएको मन्त्रालयले जनाएको छ ।
यसैबीच, प्रदेश नं १ मा कोरोना सङ्क्रमितको सङ्ख्या २९ हजार नाघेको छ । प्रदेशमा पछिल्लो २४ घण्टाको १६ जना सङ्क्रमित थपसँगै अहिलेसम्म जम्मा सङ्ख्या २९ हजार ८ सय ५५ पुगेको सामाजिक विकास मन्त्रालयले जनाएको छ । मोरङमा १३ हजार १ सय १२, सुनसरीमा आठ हजार ९ सय ४७, झापामा चार हजार ६ सय ४६, उदयपुरमा ४ सय ९४, इलाममा ४ सय ७२, सङ्खुवासभामा ३ सय ४१, धनकुटामा २ सय ७, पाँचथरमा १ सय ४५, ताप्लेजुङमा १ सय २०, तेह्रथुममा १ सय १९, खोटाङमा ९६, भोजपुरमा ८५, ओखलढुङ्गामा ४७, सोलुखुम्बुमा ३७ जनामा सङ्क्रमण देखिएको छ ।
प्रदेशमा सोमबार ८१ जना सङ्क्रमित निको भएसँगै २८ हजार ७ सय ३७ जना सङ्क्रमणमुक्त भएका छन् । मन्त्रालयका अनुसार अहिले होम आइसोलेसनमा ६ सय ५८ सङ्क्रमित रहेका छन् । प्रदेशमा अहिलेसम्म दुई लाख नौ हजार ९ सय ४९ जनाको पीसीआर परीक्षण गर्ने कार्य सम्पन्न गरिएको छ ।
क्याटेगोरी : समाचार
ताजा अपडेट
- पाठ्यक्रममै प्रविधिको विकास गरौँ
- पूर्वपश्चिम राजमार्गअन्तर्गत बागमती पुल जीर्ण बनेपछि दुर्घटनाको जोखिम
- धरौटिमा छुटे दिपेश पुन
- अर्थमन्त्री पुनको उपस्थितिमा नेपाल र चीनबीच दुई सम्झौतामा हस्ताक्षर
- नेपालमा अर्थतन्त्रका चुनौतीहरू
- भूकम्पका दश वर्ष पुनर्निर्माण अलपत्र
- प्रधानमन्त्रीसँग चिनियाँ अन्तर्राष्ट्रिय विकास सहयोग एजेन्सीका अध्यक्षको शिष्टाचार भेट
- लाभांश बाड्न नसक्ने अवस्थामा फाइनान्स कम्पनीहरु
धेरैले पढेको
- समसामयिक राजनीतिक व्यङ्ग्य
- राजेन्द्र विमल र हरिहर शर्मालाई पुरस्कृत गरिने
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- एक्सेल डेभलपमेन्ट बैंकको ट्राफिक प्रहरीलाई सहयोग
- चिया पसल पनि कम्पनी ?
- इन्फिनिटी लघुवित्तको सातै प्रदेशमा तालिम सम्पन्न
- नेकपा माओवादी केन्द्र कंचनपुर-काठमाडौ सम्पर्क समन्वय समितिको पाचौं भेला सम्पन्न
तपाईको प्रतिक्रिया