डेढ लाख युवाले लिए श्रम स्वीकृति

काठमाडौँ, पुस २४
सरकारले मुलुकमा पर्याप्त रोजगारी सिर्जना गर्न नसक्दा कामकै खोजीमा युवाहरु विदेश जान बाध्य छन् । देशमा पर्याप्त रोजगारी नहुँदा युवाहरु विदेश जान बाध्य छन् भने अर्कोतर्फ विदेश गएर आएका युवाहरु समेत पुनः कामका लागि भन्दै विदेश जान गरेका छन् । यसरी विदेश जानकै लागि नयाँ श्रम स्वीकृति लिने, पुनः श्रम स्वीकृति लिने र विदामा आएर श्रम स्वीकृति लिनेको संख्या बढ्दो क्रममा रहेको छ ।

यसरी श्रम स्वीकृति लिने युवाहरुको संख्या चालू आर्थिक वर्ष (२०७६/७७)को पहिलो पाँच महिनामा डेढ लाखभन्दा बढी रहेको वैदेशिक रोजगार विभागले जनाएको छ । वैदेशिक रोजगार विभागका अनुसार चालू आवको पहिलो पाँच महिनामा विदेश जाने भन्दै एक लाख ५० हजार ६ सय ५३ जना युवाले श्रम स्वीकृति लिएका छन् । विभागले नयाँ श्रम स्वीकृति लिएर जाने, व्यक्तिगत प्रयासमा आफैँ विदेश जाने, पहिले श्रम नलिई विदेश गएका र पछि श्रम लिएका, विदामा आएर गएका युवाहरु गरेर श्रम स्वीकृति लिने युवाहरुको संख्या डेढ लाखभन्दा बढी रहेको बताएको छ ।

चालू आवको पाँच महिनाको अवधिमा सबैभन्दा बढी मंसिर महिनामा युवाहरुले श्रम स्वीकृति लिएका छन् भने सबैभन्दा कम असोजमा कम श्रम स्वीकृति लिएका छन् । मंसिरमा ५६ हजार आठ सय १० जना र असोजमा १८ हजार सात सय ७१ जना युवाले श्रम स्वीकृति लिएका छन् । चालू आवको पहिलो महिना अर्थात् साउनमा मात्र १५ हजार ६४ जना पुरुष र दुई हजार तीन सय सात जना महिला गरी कुल १७ हजार तीन सय ७१ जना, भदौमा ३५ हजार पाँच सय ७६ जना पुरुष तथा तीन हजार एक सय २८ जना महिला गरी कुल ३८ हजार सात सय चार जना युवाहरुले श्रम स्वीकृति लिएका छन्  ।

असोजमा १७ हजार छ सय सात जना पुरुष तथा एक हजार एक सय ६४ जना महिला गरी कुल १८ हजार सात सय ७१ जना, कात्तिकमा १७ हजार आठ सय ३० जना पुरुष र एक हजार एक सय ६७ जना महिला गरी कुल १८ हजार नौ सय ९७ जना र मंसिरमा ५३ हजार दुई सय १५ जना पुरुष र तीन हजार पाँच सय ९५ जना महिला गरी कुल ५६ हजार आठ सय १० जना युवाहरुले श्रम स्वीकृति लिएका छन् ।

मंसिर महिनामा मेनपावरमार्फत श्रम स्वीकृति लिने युवाहरुमा २२ हजार दुई सय ३८ जना पुरुष र एक हजार सात सय ९१ महिला गरी कुल २४ हजार २९ जना रहेका छन् भने आफ्नै पहलमा जानका लागि श्रम स्वीकृति लिनेमा एक हजार एक सय ७२ जना पुरुष र तीन सय १८ जना महिला गरी कुल एक हजार चार सय ९० जना युवाहरु रहेका छन् । यस्तै पहिला श्रम नलिई विदेश गएका र पछि श्रम लिनेको संख्या एक हजार एक सय ६८ जना पुरुष र एक सय आठ जना महिला गरी कुल एक हजार दुई सय ७६ जना तथा विदामा आएर गएका २८ हजार छ सय ३७ जना पुरुष र एक हजार तीन सय ७८ जना महिला गरी कुल ३० हजार १५ जना युवाहरुले श्रम स्वीकृति लिएको विभागले जनाएको छ ।

कोरियाका लागि २७ सय लिए श्रम स्वीकृति :- यस्तै विभागका अनुसार सोही समयमा कोरिया जाने युवाहरुको संख्या दुई हजार सात सय ७६ जना रहेको बताएको छ । जसमा पुरुषको संख्या दुई हजार पाँच सय ६० र महिला एक सय ७८ जना रहेको छ । साउनमा एक सय ६० जना पुरुष र नौ जना महिला गरी कुल ६९ जना, भदौमा एक हजार ५७ जना पुरुष र ८६ जना महिला गरी कुल एक हजार एक सय ४३ जना युवाहरुले कोरिया जानका लागि भन्दै श्रम स्वीकृति लिएका छन् ।

असोजमा छ सय ७७ जना पुरुष र ३४ जना महिला गरी कुल सात सय ११ जना, कात्तिकमा दुई सय २३ जना पुरुष र तीन जना महिला गरी कुल दुई सय २६ जना, मंसिरमा चार सय ४३ जना पुरुष र ४४ जना महिला गरी कुल चार सय ८७ जना युवाहरुले कोरिया जानको लागि भन्दै श्रम स्वीकृति लिएका छन् ।