आज पुनः २६ अर्ब ५३ करोड रुपैयाँको ट्रेजरी बिक्री हुने

काठमाडौं ।
नेपाल राष्ट्र बैंकले असार ७ अर्थात् आज सोमबार पुनः २६ अर्ब ५३ करोड रुपैयाँबराबरको ट्रेजरी बिक्री गर्ने भएको छ । राष्ट्र बैंकका अनुसार आज अपराह्न ३ बजेसम्म उक्त परिमाणमा ट्रेजरी बिल बिक्री गरिएको हो । यसअघि यही जेठ ३१ गते पनि राष्ट्र बैंकले १५ अर्ब रुपैयाँ बराबरको ट्रेजरी बिल बिक्री गरेको थियो ।
राष्ट्र बैंकका अनुसार जारी मिति असार ८ गते मंगलबार तोकिएको ट्रेजरी खरिदको लागि वाणिज्य बैंक, विकास बैंक र फाइनान्स कम्पनीहरुले भाग दिन पाउनेछन् ।

बिक्री गरिने कुल ट्रेजरीमध्ये २८ दिने अवधिको पाँच अर्ब, ९१ दिने अवधिको ११ अर्ब ५३ करोड र एक सय ८२ दिने अवधिको १० अर्ब रुपैयाँको रहेको छ । यसमध्ये ९१ दिने अवधिको कुल ट्रेजरीमध्येमा नौ अर्ब तीन करोड रुपैयाँ पुरानो नवीकरणअन्तर्गत र दुई अर्ब ५० करोड नयाँ रहेको छ । यसैगरी एक सय ८२ दिने अवधिको कुल ट्रेजरीमध्ये पनि पाँच अर्ब पुरानो नवीकरणअन्तर्गत र बाँकी पाँच अर्ब नयाँ रहेको छ ।

राष्ट्र बैंकका अनुसार आज बिक्री हुुने कुल २६ अर्ब ५३ करोड रुपैयाँ बराबरको कुल ट्रेजरीमध्ये १९ अर्ब तीन करोड पुरानो नवीकरणअन्तर्गत र बाँँकी सात अर्ब ५० करोड भने नयाँ रहेको छ । यी ट्रेजरीहरुको परिपक्व हुने अवधि भने क्रमशः २०७८ साउन ५ गते, २०७८ असोज ५ गते र २०७८ पुस ६ गते तोकिएको छ ।

यसअघि गत साता पनि राष्ट्र बैंकले ९१ दिने अवधिको नौ अर्ब र तीन सय ६४ दिने अवधिको छ अर्ब रुपैयाँबराबरको ट्रेजरी बिल गरेको थियो । राष्ट्र बैंकले चालू आर्थिक वर्षभित्र दुई खर्ब २५ अर्ब रुपैयाँबराबरको आन्तरिक ऋण लक्ष्य लिएको छ । सोअनुसार चालू आर्थिक वर्षको पहिलो चौमासिकमा ५७ अर्ब रुपैयाँको आन्तरिक ऋण उठाइसकेको राष्ट्र बैंकले चालू आवको दोस्रो चौमासिकमा पनि ५६ अर्ब रुपैयाँको आन्तरिक ऋण उठाएको छ । ट्रेजरी बिल, विकास ऋणपत्र, नागरिक बचतपत्र र वैदेशिक रोजगार बचतपत्रसहितका मौद्रिक उपकरणहरु बिक्री गरेर उक्त परिमाणमा ऋण उठाइएको राष्ट्र बैंकले जानकारी दिएको छ ।

यसैगरी चालू आवको तेस्रो चौमासिकमा भने राष्ट्र बैंकले एक खर्ब १२ अर्ब रुपैयाँबराबरको आन्तरिक ऋण उठाउनेछ । यसको लागि राष्ट्र बैंकले ४९ अर्ब ५० करोड रुपैयाँबराबरको ट्रेजरी बिल, ६० अर्ब रुपैयाँबराबरको विकास ऋणपत्र दुई अर्ब रुपैयाँबराबरको नागरिक बचतपत्र र ५० करोड रुपैयाँबराबरको वैदेशिक रोजगार बचतपत्र बिक्री गर्ने तयारी गरेको छ ।