१० महिनामा चार खर्ब ६४ अर्ब ३४ करोडबराबरको भारू खरिद

काठमाडौं ।
नेपाल राष्ट्र बैंकले चालू आर्थिक वर्षको पछिल्लो १० महिनामा कुल तीन खर्ब तीन अर्ब २९ करोड रुपैयाँ तरलता प्रवाह गरेको छ । राष्ट्र बैैंकका अनुसार यस अवधिमा रिभर्स रिपोमार्फत एक खर्ब नौ अर्ब ५४ करोड र निक्षेप संकलन उपकरणमार्फत एक खर्ब ९३ अर्ब ७५ करोड गरी कुल तीन खर्ब अर्ब २९ करोड तरलता प्रशोचन गरिएको हो । अघिल्लो वर्षको सोही अवधिमा रिभर्स रिपोमार्फत २८ अर्ब र निक्षेप संकलन उपकरणमार्फत ३० अर्ब गरी कुल ५८ अर्ब तरलता प्रशोचन भएको राष्ट्र बैंकले जनाएको छ ।

चालू आवको पछिल्लो १० महिनाको अवधिमा रिपोमार्फत २५ अर्ब ६८ करोड र स्थायी तरलता सुविधामार्फत ७४ अर्ब ६९ करोड गरी कुल एक खर्ब ३७ करोड रुपैयाँ तरलता प्रवाह गरिएको छ । अघिल्लो वर्षको सोही अवधिमा रिपोमार्फत एक खर्ब १५ अर्ब ८७ करोड र स्थायी तरलता सुविधामार्फत एक खर्ब ५८ करोड गरी कुल दुई खर्ब १६ अर्ब ४५ करोड तरलता प्रवाह गरिएको राष्ट्र बैंकले जनाएको छ ।

चालू आवको पछिल्लो अवधिमा राष्ट्र बैंकले विदेशी विनिमय बजार अर्थात् वाणिज्य बैंकहरुबाट अमेरिकी डलर तीन अर्ब दुई करोड खुद खरिद गरी तीन खर्ब ५६ अर्ब ९३ करोड तरलता प्रवाह गरेको छ । अघिल्लो वर्षको सोही अवधिमा विदेशी विनिमय बजारबाट अमेरिकी डलर तीन अर्ब खुद खरिद गरी तीन खर्ब ४६ अर्ब ६५ करोड तरलता प्रवाह गरिएको थियो । राष्ट्र बैंकका अनुसार चालू आवको पछिल्लो अवधिमा अमेरिकी डलर तीन अर्ब ९४ करोड बिक्री गरी चार खर्ब ६४ अर्ब ३४ करोडबराबरको भारतीय रुपैयाँ खरिद भएको छ । अघिल्लो वर्षको सोही अवधिमा अमेरिकी डलर तीन अर्ब १८ करोड बिक्री गरी तीन खर्ब ६४ अर्ब ७४ करोडबराबरको भारतीय रुपैयाँ खरिद भएको राष्ट्र बैंकले जानकारी दिएको छ ।

यसैबीच राष्ट्र बैंकले सहुलियत दरमा प्रदान गर्दै आएको पुनर्कर्जा २०७८ वैशाख मसान्तमा एक खर्ब २८ अर्ब ४४ करोड लगानीमा रहेको छ । यसबाहेक करिब २० अर्ब पुनर्कर्जा स्वीकृत भई लगानीको क्रममा रहेको छ । २०७८ बैशाख मसान्तसम्ममा ९५ हजार आठ सय छ जना ऋणीलाई सहुलियतपूर्ण कर्जा प्रवाह भई एक खर्ब ४९ अर्ब ७६ करोड कर्जा बक्यौता रहेको छ । राष्ट्र बैंकका अनुसार यसमध्ये कृषि तथा पशुपक्षी व्यवसाय कर्जाअन्तर्गत ४३ हजार नौ सय ९७ ऋणीलाई प्रवाह भएको एक खर्ब १० करोड कर्जा रहेको छ भने महिला उद्यमशील कर्जाअन्तर्गत ४९ हजार चार सय ५० महिला उद्यमीलाई प्रवाह भएको ४६ अर्ब ४६ करोड कर्जा रहेको छ ।

सहुलियतपूर्ण कर्जाका अन्य शीर्षकअन्तर्गत दुई हजार तीन सय ५९ ऋणीको तीन अर्ब २० करोड कर्जा बक्यौता रहेको छ । राष्ट्र बैंकका अनुसार व्यावसायिक निरन्तरता कर्जा प्रवाह कार्यविधि, २०७७ बमोजिम कोभिड–१९ प्रभावित पर्यटन र घरेलु, साना तथा मझौला उद्यम क्षेत्रको व्यवसाय निरन्तरतामा सहयोग पु-याउन ती क्षेत्रका श्रमिक तथा कर्मचारीको पारिश्रमिक भुक्तानीका लागि व्यवस्था गरिएको कर्जा २०७८ वैशाख मसान्तसम्ममा ४८ करोड ६१ लाख स्वीकृत भएको छ ।