एनआईसी एशिया बैंकका सीईओ रोशन न्यौपानेद्वारा सरकारी जग्गा अतिक्रमण

काठमाडौं । एनआईसी एशिया बैंकका प्रमुख कार्यकारी अधिकृत (सीइओ) रोशन कुमार न्यौपानेले सरकारी जग्गा अतिक्रमण गरेर आफ्नो नीजि निवास निर्माण गरेको खुलाशा भएको छ। धोवीखोलाको शिरतर्फ बुढानिलकण्ठ नगरपालिका वडा नम्बर २ भंगालपञ्जिटोलस्थित शिव मन्दिर नजिकै न्यौपाने निवास बन्दै छ । सोही निवास निर्माण गर्न उनले सरकारी जग्गा अतिक्रमण गरेका हुन् ।

केहीदिन अघि मात्रै एनआईसी एशिया बैंकको दोस्रो कार्याकालका लागि सीईओ नियुक्त भएका न्यौपानेले यस्तो विवादास्पद गतिविधि गरेको सार्वजनिक भएको छ । विभिन्न लोकप्रीय नारा दिएर चर्चामा आएको यो बैंकका सिईओले नै सरकारी जग्गा अतिक्रमण गरेको घटना सार्वजनिक हुँदा समेत सरोकारवाला निकाय मौन छ ।

पूर्वी मोहडा बनेर निर्माण भएको उक्त महल कुनै राजा महाराजाको ‘दरबार’ भन्दा भव्य तरिकाले निर्माण गरिँदैछ । महल भित्रै मन्दिर, बार लगायत निर्माण भइरहेको छ ।

भवनको पूर्वी भागमा धोविखोला छ । धोवीखोलामाथिको भिरालो जमिन उठाएर वाल लगाएका उनले वर्षौंदेखि सरकारी जग्गा अतिक्रमण गरेका रहेछन् । त्यस्तै उत्तर तर्फ पनि करिब ४/५ आना जग्गा अतिक्रमण गरेर वाल लगाएका थिए । दक्षिण तर्फको एक रोपनी जग्गामा उनले विभिन्न भौतिक संरचना निर्माण गरिरहेका छन् । स्थानियबासीका अनुसार उनले बनाएको भौतिक संरचना अवैध हो । तर, शक्तिशाली व्यक्तिहरुको छत्रछायाँमा न्यौपानेले यस्तो रवाफ देखाएका हुन् ।

उनले सरकारी जग्गा हडपेपछि बुढानिलकण्ठ नगरपालिका वडा नम्बर ३ ले त सुचना नै निकालेर अवैध संरचना भत्काउन निर्देशन दिएको थियो । गत अशोज २ गते सुचना नै निकालेर अनाधिकृत संरचना हटाउनेबारे ३५ दिने सुचना निकालेको थियो । वडाध्यक्ष राजेन्द्र श्रेष्ठद्वारा जारी सुचनामा पर्ति जग्गा अतिक्रमण भएको र उक्त जग्गा अतिक्रमण नहटाए वडाले नै हटाउने भनिएको थियो । उक्त सुचना जारी भएपछि वर्षौंदेखि रजाइँ गरिरहेका न्यौपानेले हाल केही भाग छाडेर नयाँ वाल लगाइरहेका छन् ।

स्थानिय एक बृद्ध महिलाका अनुसार न्यौपानेले आफ्ना ससुराका बलमा सरकारी पर्ति जग्गा अतिक्रमण गरेका हुन् । रसुवा घर भएका उनले मालपोतका एक कर्मचारीको छोरी विवाह गरेका छन् । मालपोतकै कर्मचारी भएका कारण न्यौपानेलाई पर्ति जग्गा हत्याउन सहज भएको ती व्यक्तिको भनाई छ ।

घरको गेट प्रवेश गर्न बाटो नै साटियो : वडाध्यक्ष श्रेष्ठ
बुढानिलकण्ठ नगरपालिका वडा नम्बर २ का वडाध्यक्ष राजेन्द्र श्रेष्ठका अनुसार यसअघिका जनप्रतिनिधीको मिलेमतोमा उक्त बाटो बन्द गरेर अर्को बाटो साटिएको थियो । ‘मेरो पालामा त सरकारी र पर्ति जग्गा अतिक्रमण गर्नेलाई २५ दिन भित्र हटाउन सुचित गरिएको हो । त्यो सुचना अनुसार आफ्नो आफ्नो हिसाबले सबैले हटाउन थाल्नु भएको छ,’ श्रेष्ठले भने सँग भने,‘उहाँले पनि आफै भत्काउन थाल्नु भयो । पहिले कसरी नक्सा पास भयो । कसरी वाल निर्माण भयो भन्ने विषयमा म भन्दा अगाडी नै त्यो निर्णय भएको हुनाले मैले केही भन्न मिलेन ।’