Techie IT
×
गृहपृष्ठसमाचारनिर्माण व्यवसायी महासंघका अध्यक्षद्वारा दुई मोटरेबल पुल निर्माणकार्य अलपत्र

निर्माण व्यवसायी महासंघका अध्यक्षद्वारा दुई मोटरेबल पुल निर्माणकार्य अलपत्र


काठमाडौं । नेपाल निर्माण व्यवसायी महासंघका अध्यक्ष रवी सिंहले सोलुखुम्बुमा निर्माण गर्नुपर्ने दुई मोटरेबल पुल निर्माणकार्यलाई अलपत्र पारेका छन् । सोलेको थुलुङ दुधकोशी गाउँपालिकामा निर्माण भइसक्नुपर्ने दुईवटा मोटरेबल पुलको निर्माणकार्य उनले हालसम्म सुचारु गरेका छैनन् ।

गाउँपालिकाको दिप्लीघाट र बर्खुघाट मोटरेबल पुल निर्माणकार्य सम्पन्न गरिसक्नुपर्ने समयमा समेत निर्माण जिम्मा पाएका महासंघका अध्यक्ष सिंह कम्पनी सम्पर्कविहीन भएपछि गाउँपालिका अध्यक्ष असिम राईले ठेकेदार कम्पनीलाई सार्वजनिक ध्यानाकर्षण गराएका छन् । महासंघका अध्यक्ष सिंहको निर्माण कम्पनी महादेव खिम्ती हिराचन जेभीले ठेक्का पारेको भए पनि आयोजना थालनीमा विलम्ब गरिरहेको भन्दै गाउँपालिकाका अध्यक्ष राईले महासंघ अध्यक्ष सिंहको ध्यानाकर्षण गराएका हुन् ।

राईले आयोजना निर्माण भइसक्नुपर्ने अवधि बितिसक्दा समेत काम सुरु नै नगरेको भन्दै सामाजिक सञ्जालमार्फत असन्तुष्टि जनाएका छन् । दिप्लिघाट मोटरेबल पुल गत आर्थिक वर्षमै सम्पन्न गर्नेगरी २०७५ सालमा अध्यक्ष सिंहको निर्माण कम्पनी महादेव खिम्ती हिराचन जेभीले ठेक्का सम्झौता गरेको थियो । सोही कम्पनीले ३३ महिनाभित्र सम्पन्न गर्नेगरी २०७७ सालमा सम्झौता गरेको बर्खुघाट मोटरेबल पुलको पनि शिलन्यासमै सीमित बनेको छ ।

सडक विभाग, पुल महाशाखाअन्तर्गत दिप्लीघाट पुल १० करोड ९८ लाख रुपैयाँ र बर्खुघाट पुल ११ करोड ६० लाख रुपैयाँमा ठेक्का सम्झौता गरेको थियो ।


क्याटेगोरी : समाचार

तपाईको प्रतिक्रिया