सभामुख र राष्ट्रियसभा अध्यक्षद्वारा उपराष्ट्रपति निर्वाचनमा मतदान

काठमाडौं । प्रतिनिधिसभाका सभामुख देवराज घिमिरे र राष्ट्रियसभाका अध्यक्ष गणेशप्रसाद तिमिल्सिनाले उपराष्ट्रपति पदको निर्वाचनमा मतदान गरेका छन् । सङ्घीय संसद् भवन नयाँ बानेश्वरमा रहेको मतदान केन्द्रमा पुगेर उनीहरुले मतदान गरेका हुन् ।

शुक्रबार बिहान १० बजेदेखि उपराष्ट्रपतिको निर्वाचनका लागि मतदान सुरु भएको छ । बिहान झण्डै १२ बजेसम्म ४०९ मत खसेको जनाइएको छ । निर्वाचनमा नेकपा (एमाले) की अष्टलक्ष्मी शाक्य, जनमत पार्टीकी ममता झा र जनता समाजवादी पार्टी (जसपा)का रामसहायप्रसाद यादव उम्मेदवार रहेका छन् । मतदानको समय अपराह्न ३ बजेसम्म तोकिएको छ ।