देशको आर्थिक र वित्तीय अवस्थाको बारेमा गभर्नरले जानकारी गराउँदै

काठमाडौं, नेपालको वर्तमान आर्थिक तथा वित्तीय स्थितिको बारेमा नेपाल राष्ट्र बैंकले आज दिउँसो पत्रकार सम्मेलन गरेर जानकारी गराउने भएको छ । दिउँसो साढे एक बजे राजधानीको एक होटलमा पत्रकार सम्मेलन गरेर त्यसको बारेमा राष्ट्र बैंकका गभर्नर महाप्रसाद अधिकारीले नै जानकारी दिन लागेका हुन् ।

गभर्नर अधिकारी केही दिन अगाडिदेखि निर्माण व्यवसायीले गरेको कामको भुक्तानी दिएर देशको अर्थतन्त्रलाई चलायमान गराउन अर्थ मन्त्रालयलाई आग्रह गर्दै आएका छन् । भुक्तानी नहुँदा आर्थिक चेनमै असर परेको गभर्नर अधिकारीको भनाइ छ ।

अहिले बैंकमा पैसा थुप्रिएको तर ऋण माग्न आउनेमा कमि आएको छ । यही बेला सरकारले कामको भुक्तानी नदिँदा आर्थिक गतिविधि अलपत्र जस्तै छ । आर्थिक र वित्तीय अवस्थाका बारेमा विभिन्न निकायबाट फरक फरक धारणा आइरहेको बेला राष्ट्र बैंकको धारणालाई आधिकारिक मानिन्छ ।