चितवनमा रोकिएको मतदान पुन : सुरु

चितवन । चितवनका दुईवटा केन्द्रमा रोकिएको मतदान सुरू भएको छ । भरतपुर महानगरपालिका वडा नं. ११ मा पर्ने नयाँ किरण मा.वि. केन्द्रमा मतदान भइरहेको बेला तनावको स्थिति उत्पन्न भएपछि मतदान रोकिएको थियो ।

भरतपुर महानगरपालिका भोजाडस्थित नयाँ किरण कमल कुसुम मा.वि. केन्द्रमा र भरतपुरकै वडा नम्बर ७ स्थित कृष्णपुर मा.वि. केन्द्रमा रोकिएको मतदान सुरु भएको हो ।

रवि लामिछाने भरतपुर–१२ को मोहन मा.वि.बाट नयाँ किरण मा.वि. भोजाडमा जाँदा उनका समर्थकहरूले पक्षमा नारावाजी गरेका थिए । मतदानस्थलमा नाराबाजी गरेको भन्दै त्यसको विरोध अन्य दलले गरेपछि तनाव उत्पन्न भएको हो ।

सोक्रममा मतदानस्थल बाहिर केहीबेर झडप भएको थियो । प्रहरीले लाठीचार्ज गर्दै स्थिति नियन्त्रणमा लिएको थियो । अवस्था सामान्य भएपछि विद्यालयको गेट खोलिएको छ र मतदान पुनः सुरु भएको छ ।