एमालेद्वारा प्रतिनिधि सभाको बैठक अवरुद्ध

काठमाडौं । राष्ट्रपति रामचन्द्र पौडेलले नागरिकता विधेयक प्रमाणीकरणका लागि प्रक्रिया नपुर्याएको भन्दै प्रमुख प्रतिपक्ष दल नेकपा एमालेले प्रतिनिधि सभाको बैठक अवरुद्ध गरेको छ । ‘संसदलाई छलेर राष्ट्रपतिबाट गैरसंवैधानिक कार्य भएको छ,’ एमाले प्रमुख सचेतक पदम गिरीले भने, ‘विधेयक प्रमाणीकरणको प्रक्रियाप्रति हाम्रो असहमति हो । संसद चल्न दिदैनौं ।’

आइतबार बिहान ११ बजे प्रतिनिधि सभाको बैठक बस्ने गरी बोलाइए पनि निर्धारित समयमा बैठक सुरु हुन सकेको छैन । १७ जेठमा राष्ट्रपति पौडेलले नागरिकता विधेयक प्रमाणीकरण गरेका थिए । मन्त्रिपपिरषद् बैठकले नागरिकता विधेयक प्रमाणीकरण गर्न आग्रह सहितको पत्र राष्ट्रपतिलाई १२ जेठमा लेखेको थियो ।