बन्दाले मूल्य नपाउँदा किसान चिन्तित

सोलुखुम्बु । सोलुखुम्बुमा उत्पादन भएको अर्गानिक बन्दाले मूल्य नपाउँदा यहाँका किसान चिन्तित बनेका छन् । जिल्ला सदरमुकाम क्षेत्रमा उत्पादित बन्दाले उचित मूल्य र बजार नपाउँदा यतिकै खेर जाने सम्भावना बढेको हो ।

सोलुदूधकुण्ड नगरपालिका ६ छुल्यामुका राजु विश्वकर्माले करिब ३० किलो बन्दा साप्ताहिक हाट नयाँ बजारमा बिक्रीका लागि ल्याए पनि बिक्री नभएको बताए । मेहनतले उत्पादन गरेको अर्गानिक बन्दाले उचित मूल्य नपाउनु त छँदैछ सस्तो मूल्यमा समेत बिक्री नभएको उनले दुखेसो गरे । नयाँ बजारमै खोरियाकी ल्हेमी लामाले पनि बन्दा बिक्रीका लागि ल्याएकी थिइन् । तर उनले पनि बन्दा बिक्री गर्न नसकेपछि घरमै फिर्ता लान लागेको सुनाइन् । नयाँ बजारमा शनिबार प्रतिकिलो १० देखि २० रुपैयाँसम्ममा बन्दा बिक्री भएको थियो । किसानले मेहनत गरी लगाएको बन्दाले लगानी त परको कुरा गाडी भाडासमेत उठाउन मुस्किल भएपछि किसान चिन्तित बनेका छन् ।

तरकारीले बजार तथा मूल्य नपाउँदा कुहिएर खेर जाने अवस्थामा पुगेको सन्देश राईको दुःखेसो छ । जिल्लामा बन्दा उत्पादन बढी र खपत कम हुँदा अर्गानिक उत्पादन वस्तुभाउलाई खुवाउन किसान बाध्य छन् ।