धनगढी, सुदूरपश्चिम प्रदेश सरकारले आगामी आर्थिक वर्ष २०८३/८४ का लागि हालसम्मकै सबैभन्दा ठूलो आकारको बजेट सार्वजनिक गरेको छ। आर्थिक मामिलामन्त्री विक्रमसिंह धामीले सोमबार मध्यराति प्रदेश सभामा ३७ अर्ब ७० करोड रुपैयाँ बराबरको बजेट प्रस्तुत गरेका थिए ।
चालु आर्थिक वर्षको बजेटभन्दा वृद्धि गर्दै ल्याइएको यो बजेट प्रदेश सरकारको इतिहासमै सबैभन्दा ठूलो भएको दाबी गरिएको छ। सरकारले चालु आर्थिक वर्षको सम्भावित बचत, आन्तरिक राजस्वमा भएको वृद्धि तथा प्राकृतिक स्रोतबाट प्राप्त हुने आम्दानीलाई आधार बनाएर बजेटको आकार विस्तार गरेको जनाएको छ।
बजेट प्रस्तुत गर्न प्रारम्भिक रूपमा सोमबार साँझ ५ बजे प्रदेश सभाको बैठक बोलाइएको थियो। तर, सत्तारूढ दल नेकपा (एमाले) ले सिफारिस गरेका आयोजना, प्रदेश सभा सदस्यका क्षेत्रगत योजना तथा मन्त्रालयगत बजेट व्यवस्थापनका विषयमा असहमति जनाएपछि बैठक रातिसम्मका लागि सारिएको थियो। अन्ततः मध्यरातिमा बजेट प्रस्तुत गरिएको हो।
यता, प्रतिपक्षी दल नेपाल कम्युनिस्ट पार्टीले भने मध्यरातिमा बजेट ल्याउनुको कारण स्पष्ट पार्न माग गर्दै प्रदेश सभाको बैठक बहिष्कार गरेको थियो। प्रतिपक्षी सांसदहरू बजेट प्रस्तुत हुनुअघि नै बैठकबाट बाहिरिएका थिए।
सुदूरपश्चिम प्रदेशको बजेटको इतिहास हेर्दा आर्थिक वर्ष २०७४/७५ मा पहिलो पटक एक अर्ब दुई करोड पाँच लाख रुपैयाँको आंशिक बजेट ल्याइएको थियो। त्यसपछि आर्थिक वर्ष २०७५/७६ मा २५ अर्ब ६ करोड ५६ लाख, २०७६।७७ मा २९ अर्ब २३ करोड ३० लाख, २०७७।७८ मा ३४ अर्ब ६४ करोड ३९ लाख रुपैयाँको बजेट सार्वजनिक गरिएको थियो।
त्यस्तै, आर्थिक वर्ष २०७८।७९ मा ३१ अर्ब १७ करोड ५६ लाख, २०७९/८० मा ३६ अर्ब ३३ करोड ८९ लाख, २०८०/८१ मा २९ अर्ब २६ करोड ५९ लाख तथा २०८१र८२ मा ३१ अर्ब ६२ करोड ९८ लाख रुपैयाँको बजेट ल्याइएको थियो। चालु आर्थिक वर्ष २०८२/८३ का लागि प्रदेश सरकारले ३३ अर्ब ४५ करोड ५१ लाख रुपैयाँको बजेट विनियोजन गरेको छ।
आगामी आर्थिक वर्षका लागि ल्याइएको ३७ अर्ब ७० करोड रुपैयाँको बजेटले प्रदेशको विकास निर्माण, सेवा प्रवाह तथा आर्थिक गतिविधिलाई थप गति दिने अपेक्षा गरिएको छ। यद्यपि, बजेट निर्माण प्रक्रियामै देखिएको राजनीतिक असमझदारीले यसको प्रभावकारी कार्यान्वयन चुनौतीपूर्ण बन्न सक्ने संकेत पनि गरेको छ।
