बैंकिङ कसुर मुद्दाका फरार प्रतिवादी लिम्बु पक्राउ

काठमाडौं । केन्द्रीय अनुसन्धान ब्युरो (सीआईबी)ले बैंकिङ कसुर मुद्दाका फरार प्रतिवादी अन्दीराम इजम लिम्बुलाई पक्राउ गरेको छ । सीआईबीका प्रवक्ता प्रहरी उपरीक्षक श्याम कुमार महतोका अनुसार बुढानीलकण्ठ नगरपालिका–३ ठूलोभंगाल, चपली बस्ने ताप्लेजुङ फुलपिङ नगरपालिका–११ स्थायी वतन भएका ४६ लिम्बुलाई शुक्रबार पक्राउ गरिएको हो ।

बैंकिङ कसुरसम्बन्धी मुद्दामा उच्च अदालत पाटनको २०७६ मंसिर १० गतेको आदेशले पाँच दिन कैद र ३० लाख रुपैयाँ जरिवाना ठहर भई फरार रहेका लिम्बुलाई प्रहरी प्रधान कार्यालय केन्द्रीय अनुसन्धान ब्युरो महाराजगञ्जबाट खटिएको प्रहरीले भक्तपुर नयाँठिमीबाट पक्राउ गरेको प्रहरी उपरीक्षक महतोले बताए ।

लिम्बुले आफ्नो खातामा पर्याप्त मौज्दात रकम नभएको भन्ने जानीजानी पीडितलाई २०७४ पुस २८ गते सिद्धार्थ बैंक लिमिटेडको चेक काटी दिएको कसुरमा अदालतले उक्त फैसला गरेको थियो । पक्राउ परेका लिम्बुलाई फैसला कार्यान्यवनका लागि जिल्ला अदालत काठमाडौँमा पेस गरिएको उनले बताए ।