नयाँ स्टक एक्सचेन्ज सञ्चालनको लागि आवेदन माग

काठमाडौं । नेपाल धितोपत्र बोर्डले नयाँ स्टक एक्सचेन्ज सञ्चालन गर्नको लागि आवेदन माग गरेको छ । बोर्डले आइतबार सार्वजनिक सूचना जारी गर्दै धितोपत्र बजार (स्टक एक्सचेन्ज), वस्तु विनिमय बजार (कमोडिटी एक्सचेन्ज) तथा धितोपत्र दलाल तथा धितोपत्र व्यापारी (स्टक ब्रोकर र स्टक डिलर) को सञ्चालन अनुमतिको लागि आवेदन माग गरेको हो ।

बोर्डले सूचना जारी भएको मिति अर्थात् (२०७९ असोज २ गतेको मितिले स्टक ब्रोकर र स्टक डिलरको हकमा ३० दिनभित्र आवेदन दिइसक्नुपर्ने गरी सूचना जारी गरेको हो । नयाँ स्टक एक्सचेन्जको हकमा भने सूचना जारी भएको मितिले ४५ दिनको अवधि तोकेर सूचना जारी गरिएको बोर्डले जानकारी दिएको छ ।

बोर्डका अनुसार सीमित कारोबार गर्ने स्टक डिलरको लागि २० करोड रुपैयाँ चुक्ता पुँजी हुनुपर्नेछ भने पूर्ण कार्य गर्ने दलाल व्यवसायीको लागि न्यूनतम चुक्ता पुँजी ६० करोड रुपैयाँ हुनुपर्नेछ । यसैगरी स्टक डिलरको लागि भने न्यूनतम एक अर्ब ५० करोड न्यूनतम चुक्ता पुँजी हुनुपर्नेछ ।