एक युवतीको खुकुरी प्रहार गरी हत्या

किमाथाङ्का । खुकुरी प्रहार गरी सङ्खुवासभाको खाँदबारी नगरपालिका–१ घिमिरेगाउँमा शुक्रबार एक युवतीको हत्या गरिएको छ । सभापोखरी गाउँपालिका–१ घर भई खाँदबारी–१ बस्दै आएकी २१ वर्षीया युना दर्नालको हत्या भएको हो ।

सभापोखरी गाउँपालिका–१ कै २३ वर्षीय नन्दराम गदालले दर्नालको हत्या गरेका हुन् । उनी खाँदबारीमा डेरा गरी बस्दै आएकी थिइन् । गदालले युवतीको हत्या गरेपछि खुकरी प्रहार गरी आत्महत्याको प्रयास गरेको जिल्ला प्रहरी कार्यालयका प्रहरी नायब उपरीक्षक वीरेन्द्र गोदारले जानकारी दिएका छन् ।

युवतीको हत्या गरेपछि गदालले आफ्नै पेटमा खुकुरी प्रहार गरी गम्भीर घाइते भएका उनको जिल्ला अस्पताल खाँदबारीमा उपचार भइरहेको छ । बिहीबारमात्र नेपाल प्रहरीको तीन महिने तालिम सकेर गदाल खाँदबारी आएको खुलासा भएको छ ।

गए राति गदाल मृतक दर्नालको डेरामा बसेको बताइएको छ । बिहान स्थानीयले घटनाबारे थाहा पाएपछि प्रहरीलाई खबर गरेका थिए । हत्याको कारण भने खुल्न नसकेको डिएसपी गोदारले बताए । घटनाबारे प्रहरीले अनुसन्धान गरिरहेको छ ।