फेरारीको नाफा घट्ने अनुमान

मिलान, वैशाख २३
विलासी स्पोर्ट्स कार निर्माता कम्पनी फेरारीले सन् २०२० का लागि यसअघि गरेको नाफा अनुमान कटौती गरेको छ । सोमबार कम्पनीले विश्व महामारीका कारण कम्पनीको नाफा अझै घट्ने अनुमान गरेको हो । चालू वर्षको दोस्रो त्रैमासिकमा कोरोनाको असर अझै गहिरिने कम्पनीको भनाइ छ ।

रातो फर्मुला १ रेसिङ कारका लागि चर्चित कम्पनीले विभिन्न ब्याज, करलगायतका कारण गत वर्षभन्दा कम अर्थात् १ देखि १ अर्ब २० करोड युरोसम्म हुने अनुमान गरेको हो । यसअघि फेब्रुअरीमा कम्पनीले यो वर्ष नाफा १ अर्ब ३८ करोडदेखि १ अर्ब ४३ करोड युरो हुने अनुमान गरेको थियो ।

इटलीको कम्पनीले सोमबारदेखि मारानेलो र मोडेनास्थित कार प्लान्टमा काम सुरु गरेको छ । कम्पनीका अनुसार फर्मुला १ कारको आम्दानी ह्वात्तै घट्नसक्नेछ । किनभने कार दौड प्रतियोगिताहरु विश्वभर रोकिएका छन् । कम्पनीको उक्त अनुमानसँगै सेयर २.७ प्रतिशत अर्थात् १३९.५५ युरो प्रतिकित्ताले घटेको थियो । फेरारीले सन् १९२९ देखि कार उत्पादन गर्दै आएको छ ।