विदेशमा सीप सिक्नुहोस्, अनुभव बटुल्नुहोस् अनि आफ्नै देश फर्किनुहोस्, काम गर्नुहोस्

‘राशोभा’ संस्कृत नाम हो, यसको वास्तविक अर्थ के हो ?

अहिले नै त मलाई थाहा छैन, म यो नामको वास्तविक अर्थ के हो ? अझै गहिरिएर बुझ्नेछु । तर मैले बुझेको एउटै अर्थ राशोभा हाम्रो जीवन हो, यसको प्रत्येक अक्षरहरू हामीसँग अर्थात् भनौँ हाम्रो परिवारसँग जोडिएको छ । सधैँ जोडिरहनेछ । साँचो अर्थमा भन्नुपर्दा राशोभा मेरो बाबा र आमाको नामबाट केही अक्षर निकालेर हामीले बनाएका हौँ, जसले अहिले हाम्रो सिंगो परिवारलाई एकै सूत्रमा बाँधेको छ, एउटा सुन्दर फूलको मालासरी । मेरो बाबाको नाम रामशरण केसी हो, मेरो आमाको नाम शोभा केसी हो । यसैबाट हामीले राशोभा बनाएका हौँ, जुन कम्पनीमार्फत अहिले हामीले हिराको व्यापार गर्ने आएका छौँ । राशोभा जसले तपाईँलाई चम्काउनेछ भन्ने स्लोगनसहित हामीले यो कम्पनी सुरु गरेका हौँ, यसलाई हामीले नेपालको पहिलो प्राइभेट ज्वेलरीको रूपमा चिनाउने लक्ष्य राखेका छौँ’, यो भनाइ हो राशोभाका निर्देशक शुधीरशरण केसीको । उमेरले केही कम भए पनि व्यापार, व्यवसायमा अब्बल र राष्ट्रिय तथा अन्तर्राष्ट्रियरूपमा पनि व्यावसायिक अनुभव हासिल गरेका व्यक्ति हुन् केसी । उनैसँग आर्थिक दैनिकका तर्फबाट सुरेश राउतले गरेको कुराकानीको सम्पादित अंश ।

तपाईँको भाषामा राशोभा भनेको के हो ?

यो संस्कृत शब्द हो, यसको शाब्दिक अर्थ त अहिले मलाई त्यति जानकारी छैन । तर यो नाम हामीले आफ्नो आमा र बुबाको नामबाट केही शब्द निकालेर बनाएका हौँ । ज्वेलरी कारोबारको लागि हाम्रो शरण फाइन ज्वेलरी नामक एउटा कम्पनी छ, त्यो कम्पनीलाई हामीलाई राशोभाको नामबाट ब्रान्डिङ गरेका हौँ ।

युवा हुनुहन्छ, अन्य व्यवसाय पनि त गर्न सक्नुहुन्थ्यो, कसरी लाग्नुभयो हिराको व्यापारमा ?

हिरा हाम्रो पुर्ख्यौली व्यवसाय हो । मेरो बुबाको सिंगो जीवन त्यही हिराको व्यापारमा बितेको छ । उहाँको जीवनमा धेरै उतारचढावहरू, धेरै हन्डरहरू आएका थिए । ती सबैलाई चिर्दै पन्छाउँदै अहिले हामीले राशोभा ब्राण्डलाई चिनाउने प्रयास गरेका हौँ । मैले अन्य व्यवसाय पनि गर्नसक्थे । तर मेरो परिवार, आमाबुबाको सपनासँग जोडिएको व्यवसायबाट टाढा हुन् सकिनँ । म जे गर्छु, जहाँ गर्छ, यसमा नै केही गर्छ, यहीसँग जोडिएर नै केही गर्छु भन्ने लक्ष्यसहित म यसमा लागेको हुँ ।

भनेपछि तपाईँहरूले गर्ने व्यापार हिरा मात्र हो ?

अहँ होइन, हामीसँग अहिले चारवटा कम्पनीहरू रहेका छन् । शरण फाइन ज्वेलरी, शरण हस्पिट्यालिटी प्रालि, ट्रेड हाउस अफ नेपाल बीभी र शरण इन्टरपाइजेज । यी कम्पनीहरूको नामअनुसार काम पनि फरक–फरक रहेको छ । यी सबै कम्पनीहरूमा गरी अहिले झण्डै ५० जना जति कर्मचारीहरू कार्यरत रहेका छन् ।

मैले फेरि हिरालाई नै फोकस गरेँ, हिराको व्यापार गर्न त, अनुभव र अध्ययन पनि चाहिन्छ नि होइन र ?

हो नि अनुभव र अध्ययनबिना कुनै पनि व्यापार व्यवयाय गर्न गाह्रो हुन्छ, व्यापार व्यवसाय गरे पनि टिक्न गाह्रो हुन्छ । जहाँसम्म मेरो व्यावसायिक अनुभवको कुरा छ, मैले नेदरल्याण्डमा इन्टरनेसनल बिजनेस एडमिनिस्ट्रेसन पढेको हो । मलाई इन्टरनेसनल ट्रेडको बारेमा राम्रो जानकारी छ । मैले जेम्स एन्ड ज्वेलरीको बारेमा पनि धेरै अध्ययन गरेको छु । व्यापार व्यवसायको क्रममा युरोपका धेरै देश, धेरै सहर घुमे, एसियाका पनि धेरै देश र सहर घुमे । भारतको जयपुर जेम्स एन्ड ज्वेलरी बजारमा विश्वकै सबैभन्दा ठूलोमध्येको एउटा हब हो । जयपुरमा पनि म निकै लामो समय बसेँ, काम गरेँ । जयपुरबाट नै युरोपको धेरै देश र सहरहरूमा गहना निर्यात हुने गर्दछ । यस्तै अनुभव र भोगाइबाट आफ्नै देशमा केही गर्ने सोच आयो । त्यही सोचका साथ म नेपाल फर्किए । त्यसपछि हामीले सन् २०१९ मा राशोभा सुरु ग-यौँ ।

नेपाल, त्यसमाथि पनि काठमाडौंमा गहनाको लागि नाम चलेका हिराका धेरै गहनापसलहरू छन्, राशोभा नै किन आउने ?

राशोभाको लागि हाम्रो स्लोगान रहेको छ, ‘साइन अन यु’ अर्थात् जसले तपाईँलाई चम्काउनेछ । राशोभाले यही स्लोगानलाई चरितार्थ गर्छ । हामी नेपालमा पहिलो प्राइभेट ज्वेलरीको रूपमा स्थापित हुन चाहन्छौँ । काठमाडौंको न्युरोडजस्ता ठाउँको गहनाबजार र ती गहनाको गुणस्तरको बारेमा त त्यति भन्न सक्दिनँ तर जहाँसम्म राशोभाको कुरा छ, हामीकहाँ जीआईएद्वारा प्रमाणित गुणस्तरको गहना पाइन्छ । अन्तर्राष्ट्रियरूपमा प्रमाणित गहना मात्र हामी बेच्छौँ । बेचिसकेपछि जो हाम्रा ग्राहक हुनुहुन्छ, उहाँहरूले पहिले किनेको गहना आफ्नो घरायसी अथवा अन्य कुनै समस्याका कारण बेच्न, चाहनुहुन्छ भने त्यो पनि हामी आफैँ किनिदिन्छौँ । अर्कोतर्फ गहना किनेपछि त्यसको हेरचाह र सुरक्षा पनि राम्रोसँग गर्नुपर्छ । त्यसको लागि आवश्यक जानकारी र फलोअप पनि हामी गरिदिन्छौँ । हाम्रा लागि ग्राहक भनेका भगवान् हुन्, भगवान्को स्याहरसुसार गर्नु हाम्रो दायित्व हो । हामी यो दायित्व पूरा गरी हाम्रा ग्राहकहरूलाई सधैँ खुसी र सन्तुष्ट राख्छौँ, राखेका छौँ र सधैँ राख्नेछौँ ।

ग्राहक भगवान् भएका कुरा गर्नुभयो, अहिले कति हुनुहुन्छ यहाँहरूसँग सन्तुष्ट ग्राहक ?

यो व्यवसायमा हामी पुरानो भए पनि सन् २०१९ बाट मात्र हामीले राशोभा सुरु गरेका हौँ । मैले माथि नै भनेँ यसलाई हामीले नेपालको पहिलो प्राइभेट ज्वेलरीको रूपमा चिनाउने लक्ष्य लिएका छौँ । विदेशमा यस्तो लक्ष्य लिएका धेरै कम्पनी हुन्छन् । अन्य गहना पसलहरूमा जस्तो पसलमा नै गएर भिडभाड गरेर गहना यहाँ किनिँदैन । हाम्रो यही शरण हस्पिट्यालीटीकै हाताभित्र शोरुम रहेको छ । शोरुममा भएका सबै गहनाहरू हाम्रो फेसबुक, इन्स्टाग्राम, हाम्रो आधिकारिक वेबसाइट आदिमा राखिएका छन् । ती साइटमार्फत नै ग्राहकहरूले कुन गहना किन्ने, आफूले किन्ने गहना बजेटअनुसार छ कि छैन भनेर निर्णय गर्नुहुन्छ । तिनै साइटमार्फत गहना बुक गर्नुहुन्छ अनि शोरुममा आएर किन्नुहुन्छ । हामीकहाँ गहना किन्ने सबैजसो व्यक्तिहरू भीभीआईपीहरू नै रहनुभएको छ ।

हिराको गहना त महँगो होला नि होइन र ?

हो, यसको कुनै निश्चित मूल्य हुँदैन, त्यही भएर यसलाई बहमूल्य मानिएको हुनसक्छ । तर यसको अन्तर्राष्ट्रिय मापदण्ड त हुन्छ नि । त्यही मापदण्डका आधारमा यसको मूल्य निर्धारण हुन्छ । फेरि अर्कोतर्फ हिरा भन्दैमा त्यति धेरै महँगो हुन्छ भन्ने पनि होइन । कुनै पनि ग्राहकले आफ्नो बजेटअनुसार, आफ्नो इच्छाअनुसारको साइज र आकारमा हिराको गहना बनाउन सक्नुहुन्छ । त्यति महँगो हुँदैन ।

लामो समयसम्म हिराको व्यापारमा संलग्न हुनुहुन्छ, यसको बारेमा ग्राहकहरूबाट कस्तो प्रतिक्रिया पाउनुहुन्छ ?

हिरा अहिले आम मानिसको सुख, खुसी हाँसोसँग जोडिएको छ । त्यही कारण पनि प्रत्येक खुसीको पलहरूलाई अझ खुसी बनाउन, अझै यादगार बनाउन, जो आफ्नो हो, जो सधैँको लागि आफ्नो हुन्छ, आफूसँगै जोडिएको हुन्छ, त्यही व्यक्तिको केही पलको हाँसो र खुसीको लागि हिरा किनिन्छ, जो जीवनभर यादगार रहन्छ, त्यही हाँसो खुसीको लागि हिरा किनिन्छ । यसमा पैसाले त्यति अर्थ राख्दैन, किनकि पैसाभन्दा धेरै माथि आत्मीयता र खुसी हुन्छ । मैले ग्राहकबाट पाएको अनुभव यही हो । सायद अब पाउने अनुभव पनि यस्तै नै हुन्छ ।

अन्त्यमा के भन्नुहुन्छ ?

विदेशमा काम छ, दाम छ, तर नाम त छैन नि । तर नेपालमा काम गर्नुहोस् काम, दाम र नाम सबै छ, विदेशमा सीप सिक्नुहोस्, अनुभव बटुल्नुहोस् । अनि आफ्नै देश फर्किनुहोस्, जसरी म फर्किए, मेरो परिवार फर्कियो अनि राशोभा जन्मियो । अहिले धेरै नेपालीहरू विदेशमा हुनुहुन्छ, पैसा अनुभव सबै कमाउनुहोस् । अनि आफ्नै देश फर्किनुहोस् । सानो–ठूलो जे हुन सक्छ, व्यवसाय गर्नुहोस् । त्यो व्यवसायले केहीले रोजगारी पाउनुहुनेछ । त्यो रोजगारीले देश नछोडीकन एउटा परिवारको हाँसो खुसी दिलाउन सक्छ । हाम्रो कर्म, हाम्रो परिवारको कर्म भनेको हो यही हो, हामीले अहिले यही कर्म गरिराखेका छौँ । केहीलाई रोजगारी दिएका छौँ । आफ्ना ग्राहकहरूको हाँसो, खुसी र सुखको एउटा अंग हुन पाएका छौँ । आशा छ हामीसँगै जोडिएर अझै धेरै ग्राहकहरूको हाँसोखुसी साटिनेछ, हामी उहाँहरूलाई खुसी राख्न सक्नेछौँ ।