डोलराज शर्माद्वारा वडा भवन निर्माणमा अवरोध

काठमाडौं ।
वडा कार्यालयको भवन निर्माणमा डोलराज शर्माले अवरोध पु-याएका छन् । उनले काठमाडौं महानगरपालिका वडा नम्बर २ को वडा कार्यालयको भवन निर्माणमा अवरोध पु-याएका हुन् । उनले परराष्ट्र मन्त्रालयअन्तर्गतको आफ्नो सम्पर्कमा रहेका कर्मचारीहरुलाई लगाएर वडा कार्यालयको भवन निर्माणमा अवरोध पु-याएका छन् ।

अख्तियार दुरुपयोग अनुसन्धान आयोगले भ्रष्टाचार गरेको अभियोगमा कारबाही गरेका शर्मा राजस्व समूहका कर्मचारी थिए । त्यतिबेला अख्तियारले उनको घरमा छापा मार्दा गमलामा गाडेको अवस्थामा थुप्रै सुन बरामद गरेको थियो । त्यस घटनापछि उनी गमलामा सुन रोप्ने कर्मचारीको रुपमा प्रचारित छन् ।

अख्तियारका प्रमुख आयुक्त सूर्यनाथ उपाध्यायले राजस्वका २२ कर्मचारीहरुमाथि छानबिन गर्दा कारबाहीमा परेकामध्येका उनी चर्चित पात्र हुन् । त्यसपछि सरकारी जागिरबाट हात धुनुपरेपछि उनले सिटी एक्सप्रेस नामको रेमिट्यान्स कम्पनीलगायतका बैंक तथा वित्तीय संस्थामा लगानी गरेको देखाएर आफ्नो सम्पत्तिलाई वैधता देखाउँदै आएका छन् ।

उनले आफ्नो विगतलाई बिर्सिएर अहिलेको सम्पत्तिको तुजुक देखाएर परराष्ट्र मन्त्रालयमातहतका कारबाही नपरेका पुराना दौतरियाहरुलाई उपयोग गरेर काठमाडौं महानगरपालिकाका मेयर विद्यासुन्दर शाक्यले शिलान्यास गरेको २ नम्बर वडाको कार्यालय भवन निर्माण प्रक्रिया अवरुद्ध बनाउने दुष्प्रयास गरेका छन् ।