मन्त्री पुनद्वारा दूधकोशी जलविद्युत् आयोजनाको स्थलगत निरीक्षण

काठमाडौं, पुस २३
ऊर्जा, जलस्रोत तथा सिँचाइमन्त्री वर्षमान पुनले ६ सय ३५ मेगावाटको दूधकोशी जलाशययुक्त विद्युत् आयोजनास्थलको मंगलबार निरीक्षण गरेका छन् । उक्त आयोजना खोटाङ, ओखलढुंगा र सोलुखुम्बुको सिमानामा निर्माण हुँदै छ । निरीक्षणपछि खोटाङको रावाबेसी गाउँपालिकामा आयोजित कार्यक्रममा मन्त्री पुनले हाल उक्त आयोजनाको विस्तृत परियोजना प्रतिवेदन (डीपीआर) अन्तिम चरणमा रहेको जानकारी दिए । उक्त आयोजनालाई राष्ट्रिय गौरवको आयोजनामा समावेश गर्ने प्रयास हुने पनि कार्यक्रममा मन्त्री पुनले बताए ।

एक अर्ब ५२ करोड अमेरिकी डलर अर्थात् करिब १ अर्ब ६० अर्ब लागतमा निर्माण सम्पन्न गर्ने लक्ष्य राखिएको दूधकोशी आयोजनाका लागि एसियाली विकास बैंक (एडिबी)ले ६० अर्ब रुपैयाँ लगानी गर्ने प्रतिबद्धता जनाइसकेको जानकारी मन्त्री पुनले दिए । सरकार आयोजनाको बाँकी लगानी जुटाउन स्वदेशी र विदेशी कम्पनीसँगको परामर्शमा रहेको पनि मन्त्री पुनले जानकारी दिए ।