अर्थसचिव परिवर्तन

काठमाडौं । सरकारले अर्थ मन्त्रालयलगायत केही सचिव परिवर्तन गरेको छ । बुधबारको मन्त्रिपरिषद् बैठकले अर्थ मन्त्रालयका सचिवमा अर्जुनप्रसाद पोखरेललाई ल्याएको छ ।

अर्थका सचिव तोयम रायालाई उपराष्ट्रपति कार्यालयमा सरुवा गरेको छ । उपराष्ट्रपति कार्यालयका सचिव टेकनारायण पाण्डे बुधबार मात्र नक्कली भुटानी शरणार्थी प्रकरणमा पक्राउ परेका थिए ।

बजेट निर्माण प्रक्रिया धमाधम चलिरहेको बेला अर्थमा सचिव परिवर्तन गरिएको छ । राष्ट्रपति कार्यालयका सचिव यादव कोइरालालाई प्रधानमन्त्री कार्यालय, राष्ट्रपति कार्यालयमा डिल्लीराम शर्मा, सुमन अर्याललाई महिला बालबालिका तथा ज्येष्ठ नागरिक मन्त्रालय सरुवा गरिएको छ ।

आइतबारदेखि बजेट अधिवेशन
काठमाडौं । सङ्घीय संसद्को बजेट अधिवेशन यही वैशाख २४ गते आइतबार बस्ने तयारी भएको छ । सरकारले अधिवेशन यही वैशाख २४ गते आइतबार आह्वान गर्न राष्ट्रपतिसमक्ष सिफारिस गर्ने निर्णय गरेको कारण बजेट अधिवेशनले चिनिने बर्खे अधिवेशन आइतबार सुरु हुनलागेको हो ।

मन्त्रिपरिषद्को बुधबार बसेको बैठकले सो निर्णय गरेको प्रधानमन्त्रीको सचिवालयले जनाएको छ । यसैगरी बैठकले एसीसी क्रिकेट प्रतियोगितामा विजयी नेपाली क्रिकेट खेलाडी र मुख्य प्रशिक्षकलाई जनही छ लाख र अन्य टिम अफिसियललार्ई जनही तीन लाख रुपैयाँ प्रोत्साहनस्वरुप उपलब्ध गराउने निर्णय गरेको छ ।