विपन्न परिवारलाई युनेस्कोको सहयोग

बाँके, साउन १६
कतार च्यारिटीको आर्थिक सहयोगमा बाँके युनस्को क्लबले जिल्लाका विभिन्न स्थानका अतिविपन्न परिवारलाई आर्थिक समृद्धि र जीविकोपार्जनका लागि बाख्रा र कुखुराका चल्ला वितरण गरेको छ । क्लबले एक औपचारिक कार्यक्रम आयोजना गरी जिल्लाका नेपालगन्ज उपमहानगर, खजुरा, राप्तीसोनारी र जानकी गाउँपालिकाका १५ अतिविपन्न परिवारलाई जिविकोपार्जनका लागि ९ लाख ३९ हजार ७५ रुपियाँ बराबरको बाख्रा र कुखुराका चल्ला वितरण गरेको हो ।

गैरसरकारी संस्था महासंघ बाँकेका अध्यक्ष नमस्कार शाह र क्लबका संरक्षक प्रवेज अली सिद्दिकीले विपन्न परिवारलाई बाख्रा र चल्ला वितरण गरेका हुन् । सो अवसरमा जीविकोपार्जनका लागि बाख्रापालन परियोजना अन्तर्गत १० विपन्न परिवारलाई प्रतिपरिवार ५ वटा पाठी बाख्रा र एउटा बोको गरेर ६ लाख ८५ हजारको वितरण गरिएको क्लबका संरक्षक सिद्दिकीले बताए ।

उनले जीविकोपार्जनका लागि साना किसान सहायता परियोजनाअन्तर्गत कुखुरापालन कार्यक्रमबाट ५ वटा विपन्न परिवारलाई प्रति परिवार सयवटा कुखुराका चल्ला, २ क्विन्टल दाना, ३ वटा पानी खुवाउने फिडर र ३ वटा वाटर ड्रम गरेर २ लाख ५४ हजार ७५ रुपैयाँको वितरण गरिएको बताए । राप्तीसोनारी गाउँपालिका ७ का पाँच परिवारलाई कुखुरापालनका लागि चल्ला लगायत अन्य सामाग्री वितरण गरिएको थियो भने राप्तीसोनारी ७ कै ३ परिवार, नेपालगन्ज उपमहानगरका ३ परिवार, खजुराका ३ परिवार र जानकी गाउँपपालिकाका १ परिरवार गरेर १० परिवारलाई बाख्रा र बोका वितरण गरिएको क्लबले जनाएको छ ।